telangana
భూసారాన్ని కాపాడితేనే వ్యవసాయం లాభసాటి: ఏఓ రామకృష్ణారెడ్డి
మోమిన్‌పేట్, మేజర్ న్యూస్: రైతులు సాగుభూమి సంరక్షణకు ప్రాధాన్యమిస్తూ, భూసారాన్ని కాపాడుకునే పద్ధతులను అనుసరించాలని వ్యవసాయ అధికారి రామకృష్ణారెడ్డి సూచించారు. మోమిన్‌పేట్ మండల పరిధిలోని బూరుగుపల్లి, కేసారం గ్రామాల్లో వ్యవసాయ శాఖ ఆధ్వర్యంలో నిర్వహించిన సాగుభూమి సంరక్షణ అవగాహన కార్యక్రమంలో ఆయన మాట్లాడారు. నేల ఆరోగ్యాన్ని కాపాడుకోవడంతో పాటు సాగు ఖర్చులను తగ్గించి, వ్యవసాయాన్ని లాభసాటిగా మార్చుకునేందుకు రైతులు తగిన జాగ్రత్తలు తీసుకోవాలని సూచించారు.రసాయనిక ఎరువులు, పురుగుమందులను విచక్షణారహితంగా వినియోగించకుండా, మట్టి పరీక్షలు నిర్వహించి నేల స్వభావాన్ని బట్టి అవసరమైన మోతాదులోనే ఎరువులు వాడాలని తెలిపారు. ప్రకృతి వ్యవసాయం, సేంద్రియ సాగు పద్ధతులు, జీవ ఎరువులు, పశువుల ఎరువు, ఆవు పేడ ఆధారిత వ్యవసాయ పద్ధతులను ప్రోత్సహించాలని సూచించారు. సాగుభూమి కోతకు గురికాకుండా తగిన చర్యలు తీసుకోవడం ద్వారా భూసారాన్ని కాపాడుకోవచ్చని, తద్వారా భవిష్యత్తులో పంటల దిగుబడులు మెరుగుపడతాయని వివరించారు. వ్యవసాయ శాఖ సూచనలను పాటిస్తూ శాస్త్రీయ పద్ధతుల్లో సాగు చేపట్టాలని రైతులకు అవగాహన కల్పించారు.ఈ కార్యక్రమంలో ఏఈఓ స్వాతి, గ్రామ సర్పంచులు వరప్రసాద్ రెడ్డి, కిష్టయ్య, ఉపసర్పంచ్ ప్రభు, వ్యవసాయ శాఖ సిబ్బంది, రైతులు, గ్రామస్తులు పాల్గొన్నారు.
రిపోర్టర్: వడ్ల మాణిక్యం చారి, మోమిన్ పేట్, వికారాబాద్ జిల్లా.
Also Read: రేపు వికారాబాద్‌కు శాసనసభాపతి గడ్డం ప్రసాద్ కుమార్.. ఆర్‌ఓబీ నిర్మాణ పనుల పరిశీలన
