అయ్యవారిపల్లి భూ బదలాయింపు కేసులో మరో కీలక చర్య

* భూభారతి కంప్యూటర్ ఆపరేటర్ రాజ్‌కుమార్ శాశ్వత తొలగింపు
* ఇప్పటికే తహసీల్దార్ అద్దంకి సునీత సస్పెన్షన్.. తదుపరి వంతు ఎవరికి?
ఉప్పునుంతల, సూర్య న్యూస్:
ఉప్పునుంతల మండలం అయ్యవారిపల్లి గ్రామంలో వెలుగుచూసిన అక్రమ భూ బదలాయింపు వ్యవహారంలో రెవెన్యూ శాఖ మరో కీలక చర్య తీసుకుంది. ఈ వ్యవహారంపై పలు పత్రికల్లో ప్రచురితమైన కథనాల నేపథ్యంలో చేపట్టిన విచారణలో అచ్చంపేట జాయింట్ కలెక్టర్ సలోని చాబ్రా సమర్పించిన నివేదిక ఆధారంగా భూభారతి కంప్యూటర్ ఆపరేటర్‌గా పనిచేస్తున్న రాజ్‌కుమార్‌ను విధుల నుంచి శాశ్వతంగా తొలగిస్తూ జిల్లా కలెక్టర్ హేమంత్ కేశవ్ పాటిల్ ఉత్తర్వులు జారీ చేసినట్లు సమాచారం.ఇదే వ్యవహారంలో తహసీల్దార్‌గా పనిచేసిన అద్దంకి సునీతను కూడా అధికారులు సస్పెండ్ చేసిన విషయం తెలిసిందే. తాజాగా కంప్యూటర్ ఆపరేటర్‌పై తీసుకున్న చర్యతో ఈ భూ బదలాయింపు వ్యవహారం మరోసారి చర్చనీయాంశంగా మారింది.సర్వే నంబర్ 115లో జరిగినట్లు ఆరోపణలు ఎదుర్కొంటున్న భూ బదలాయింపుల వెనుక ఇంకా ఎవరెవరి పాత్ర ఉంది? ఈ వ్యవహారంలో మరిన్ని బాధ్యులపై చర్యలు ఉంటాయా? అనే ప్రశ్నలు స్థానికంగా చర్చకు దారితీస్తున్నాయి. పూర్తిస్థాయి విచారణ చేపట్టి బాధ్యులందరినీ గుర్తించి చర్యలు తీసుకోవాలని ప్రజలు కోరుతున్నారు.
ఇప్పటికే ఇద్దరు అధికారులపై చర్యలు వెలువడటంతో రెవెన్యూ శాఖలో తదుపరి పరిణామాలపై ఆసక్తి నెలకొంది. విచారణ నివేదికలో మరిన్ని అంశాలు వెలుగులోకి వస్తాయా? అన్నది వేచి చూడాల్సి ఉంది.