అక్రమ బోరు తవ్వకాలపై రెవెన్యూ అధికారులు చర్యలు

జిన్నారం :బొల్లారం డివిజన్ పరిధిలోని బీరప్ప బస్తి సమీపంలో అనుమతులు లేకుండా ఏర్పాటు చేస్తున్న బోరు ని రెవెన్యూ అధికారులు చర్యలు తీసుకున్నారు. ప్రభుత్వ నిబంధనలను పట్టించుకోకుండా, సంబంధిత శాఖల నుంచి ఎలాంటి ముందస్తు అనుమతులు పొందకుండానే బోర్ వేస్తున్న ఘటనను స్థానికుల ఫిర్యాదు మేరకు అధికారులు గుర్తించారు. ఈ నేపథ్యంలో మంగళవారం స్థానికుల ఫిర్యాదు మేరకు జిన్నారం తాసిల్దార్ ఆదేశాల మేరకు రెవెన్యూ ఇన్స్పెక్టర్లు శ్రీనివాస్ ,యాదయ్యలు రంగంలోకి దిగి స్థానిక చర్చి బస్తీ సమీపంలో బోర్‌వెల్ తవ్వకాలకు ఉపయోగిస్తున్న వాహనాన్ని సీజ్ చేశారు. అనంతరం స్వాధీనం చేసుకున్న వాహనాన్ని తదుపరి చర్యల నిమిత్తం ఐడీఏ బొల్లారం పోలీసులకు అప్పగించారు. పట్టణ ప్రాంతాల్లో అనుమతులు లేకుండా బోర్లు వేయడం వల్ల భూగర్భ జలాల వినియోగం, తవ్వకాల నియంత్రణకు సంబంధించిన నిబంధనలు ఉల్లంఘించే అవకాశం ఉందని అధికారులు పేర్కొన్నారు. బోర్‌వెల్ తవ్వకాలు చేపట్టే ముందు తప్పనిసరిగా సంబంధిత శాఖల నుంచి అనుమతులు పొందాలని సూచించారు. నిబంధనలను అతిక్రమించి అనధికారికంగా బోర్లు వేస్తే వాహనాలను సీజ్ చేయడంతో పాటు బాధ్యులపై కఠిన చర్యలు తీసుకుంటామని వారు హెచ్చరించారు. కార్యక్రమంలో సిబ్బంది మౌలానా ,  పోలీసులు, స్థానికులు పాల్గొన్నారు.

  జిన్నారం రిపోర్టర్ యు .చంద్రశేఖర్