ఆహార భద్రతా నిబంధనలు ఉల్లంఘించిన 14 సంస్థలపై చర్యలు - అదనపు కలెక్టర్ ఆర్.ఎస్ చిత్రు

సూర్య ఆదిలాబాద్ ప్రతినిధి : ఆహార పదార్థాల నాణ్యత, పరిశుభ్రత విషయంలో నిర్లక్ష్యం వహిస్తూ, ఆహార భద్రతా నిబంధనలు ఉల్లంఘించే సంస్థలపై కఠిన చర్యలు తీసుకుంటామని జిల్లా ఫుడ్ సేఫ్టీ అధికారి బి. ప్రత్యూష స్పష్టం చేశారు.ఆహార భద్రత ప్రమాణాల చట్టం–2006 కింద ఆదిలాబాద్ పట్టణంలోని వివిధ ఆహార వ్యాపార సంస్థలపై నమోదు చేసిన 14 కేసులను న్యాయనిర్ణయ అధికారి, అదనపు కలెక్టర్ ఆర్ ఎస్ చిత్రు విచారించి పరిష్కరించినట్లు ఆమె తెలిపారు. ఈ కేసుల్లో సంబంధిత సంస్థలకు మొత్తం రూ.3.55 లక్షల జరిమానా విధించినట్లు వెల్లడించారు.

జిల్లా ఫుడ్ సేఫ్టీ అధికారి బి. ప్రత్యూష నమోదు చేసిన కేసుల విచారణ అనంతరం ఈ మేరకు జరిమానాలు విధించినట్లు పేర్కొన్నారు.

జరిమానా విధించిన సంస్థల వివరాలిల వున్నాయి పట్టణంలోని వరుణ్ బార్ అండ్ రెస్టారెంట్‌కు రూ.1,00,000.డీబీ హోల్‌సేల్ సంస్థకు రూ.50,000.సప్తగిరి ఆయిల్స్ సంస్థకు రూ.50,000.ఇతర 11 కేసులకు సంబంధించి రూ.1,55,000.మొత్తం 14 కేసుల్లో రూ.3,55,000 జరిమానా విధించినట్లు తెలిపారు.ఈ సందర్భంగా జిల్లాలోని హోటళ్లు, రెస్టారెంట్లు, కిరాణా దుకాణాలు, ఆహార తయారీ, విక్రయ సంస్థల నిర్వాహకులు తప్పనిసరిగా ఆహార భద్రతా ప్రమాణాలను పాటించాలని సూచించారు. ఆహార పదార్థాల తయారీ, నిల్వ, విక్రయాల సమయంలో నాణ్యత, పరిశుభ్రతకు అత్యంత ప్రాధాన్యత ఇవ్వాలని పేర్కొన్నారు. ప్రతి ఆహార వ్యాపార సంస్థ చెల్లుబాటయ్యే ఎఫ్‌ఎస్‌ఎస్‌ఏఐ లైసెన్స్ లేదా రిజిస్ట్రేషన్ కలిగి ఉండటంతో పాటు, దానిని వినియోగదారులకు కనిపించే ప్రదేశంలో ప్రదర్శించాలని సూచించారు.నాణ్యత లేని ఆహార పదార్థాల విక్రయాలు, తప్పుడు లేబుళ్లతో ఉత్పత్తుల అమ్మకాలు, సురక్షితం కాని ఆహార పదార్థాల సరఫరా, పరిశుభ్రత భద్రతా ప్రమాణాల ఉల్లంఘనలను తీవ్రంగా పరిగణిస్తామని హెచ్చరించారు. వినియోగదారులకు సురక్షితమైన, నాణ్యమైన ఆహారం అందించడం ప్రతి ఆహార వ్యాపార సంస్థ బాధ్యత అని పేర్కొన్నారు. నిబంధనలు పాటించని సంస్థలపై తనిఖీలు నిర్వహించి, చట్టప్రకారం జరిమానాలు విధించడంతో పాటు కఠిన చర్యలు తీసుకుంటామని ఫుడ్ సేఫ్టీ అధికారి స్పష్టం చేశారు.