25వ రోజు అదే జోరు - జాతి ఆరోగ్య మిషన్ కాంట్రాక్టు ఉద్యోగస్తుల సమ్మె

సూర్య కామారెడ్డి జిల్లా ప్రతినిధి : కామారెడ్డి జిల్లా కేంద్రంలోని కలెక్టరేట్ వద్ద గల ధర్నా చౌక్ లో జాతీయ ఆరోగ్య మిషన్ కాంట్రాక్ట్ ఔట్సోర్సింగ్ ఉద్యోగుల నిరవధిక సమ్మె 25వ రోజు కొనసాగింది. శుక్రవారం ఎన్హెచ్ఎం ఉద్యోగులు వినూత్న నిరసన చేపట్టారు. తమ పరిస్థితి దౌర్భాగ్యకరంగా మారిందని, చివరి దశకు చేరుతుందని, అంపశయ్యపై ఎన్హెచ్ఎం ఉద్యోగుల భవిష్యత్తుగా మారిందని నిరసన వ్యక్తం చేశారు. కట్టెలతో పేర్చిన అంపశయ్య పై తమ డిమాండ్లను పడుకోబెట్టి ప్రభుత్వం తమను ఆదుకోవాలంటూ నిరసన తెలిపారు. చివరి క్షణంలో తులసి దళంతో నీళ్లను పోసైన తమ ప్రాణాలను కాపాడాలంటూ నినాదాలు చేశారు. 25 రోజులుగా ప్రభుత్వం ఎటువంటి చర్యలు చేపట్టకపోవడం, కేవలం మాటలకే పరిమితం కావడం తమను తీవ్రంగా కలిచి వేస్తుందని, తమ ఉద్యోగుల పరిస్థితి దుర్లభంగా మారిందని ఆవేదన వెళ్లగక్కారు. తమవి గొంతమ్మ కోరికలు కాదని, కనీస వేతన స్కేలు ఇవ్వాలని, 180 రోజుల వేతనంతో కూడిన ప్రసూతి సెలవులు ఇవ్వాలని, ఆపదలో మరణిస్తే ఎక్స్ గ్రేషియా, ఇన్సూరెన్స్ తదితర వాటిని కోరుతున్నామని అన్నారు. ప్రభుత్వం ఏమాత్రం సాత్సారం చేయకుండా తమ సమస్యలకు పరిష్కార మార్గాలు చూపాలి అన్నారు. ఈ కార్యక్రమంలో జేఏసీ నాయకులు, వైద్య సిబ్బంది వెంకటరమణ, అశ్విని, డా.రాహుల్,డా.వేణుమాధవ్, డా.మారుతి, డా.హరీష్, శేఖర్, బాలు, రాజు,కవిత నిర్మల, స్వాతి, శ్రావణి, సుకన్య, సుప్రియ, శ్రీకాంత్ రోషిని తదితరులు పాల్గొన్నారు