22వ రోజుకు చేరుకున్న ఆరోగ్య మిషను కాంట్రాక్టు ఉద్యోగుల సమ్మె

 సూర్య కామారెడ్డి జిల్లా ప్రతినిధి ;కామారెడ్డి జిల్లా కేంద్రంలోని కలెక్టరేట్ వద్ద గల ధర్నాచౌక్ లో జాతీయ ఆరోగ్య మిషన్ కాంట్రాక్ట్ ఔట్సోర్సింగ్ ఉద్యోగుల నిర్వధిక సమ్మె 22వ రోజుకు చేరుకుంది. పలువురు కాంట్రాక్ట్, ఔట్ సోర్సింగ్ ఉద్యోగులు శీర్షాసనమేసి తమ నిరసన వ్యక్తం చేశారు. "ప్రజల ఆరోగ్యం కోసం తలవంచాం, మా హక్కుల కోసం తలకిందులయ్యాం, ఇకనైనా మా గోడు వినండి ప్రభుత్వమా!" అంటూ నినాదాలు చేస్తూ తమ న్యాయపరమైన హక్కులను నెరవేర్చాలని ప్రభుత్వంపై నిరసన తెలిపారు. 22రోజులైనా ఇప్పటికీ నిర్ణయం తీసుకోకపోవడంతో ఉద్యోగులు తీవ్ర ఆవేదన చెందుతున్నారు. ఇకనైనా ఎన్ హెచ్ ఎం  ఉద్యోగులతో మాట్లాడి చర్చలకు పిలవాలని, తమ న్యాయమైన డిమాండ్లను ప్రభుత్వం పరిష్కరించేందుకు కృషి చేయాలని కోరారు. ఈ కార్యక్రమంలో జేఏసీ నాయకులు వెంకటరమణ, డా.వేణు మాధవ్, డా.రాహుల్,డా. హరీష్ డా.రాజశేఖర్, డా.రవళి, డా.స్వాతి, శోభ, యాదమ్మ, కవిత, నిర్మల, సాయమ్మ,ప్రమీల, రాజు, తదితరులు పాల్గొన్నారు.