స్వచ్ఛత హీ సేవా కార్యక్రమం.. పారిశుద్ధ్య కార్మికులకు పీపీఈ కిట్లు పంపిణీ, ఉచిత వైద్య శిబిరం ప్రారంభించిన జీడబ్ల్యూఎంసీ కమిషనర్ వెంకన్న

సూర్య వరంగల్ డెస్క్: 'స్వచ్ఛత హీ సేవా' కార్యక్రమంలో భాగంగా పారిశుద్ధ్య కార్మికుల ఆరోగ్యం మరియు భద్రతకు అత్యంత ప్రాధాన్యతనిస్తూ జీడబ్ల్యూఎంసీ కమిషనర్ టి. వెంకన్న కీలక చర్యలు చేపట్టారు. విధుల నిర్వహణలో కార్మికుల రక్షణ కోసం అవసరమైన వ్యక్తిగత రక్షణ పరికరాలను (పీపీఈ కిట్లు) ఆయన స్వయంగా పంపిణీ చేశారు. శ్రమజీవులైన పారిశుద్ధ్య కార్మికుల సంక్షేమం, పారిశుద్ధ్య నిర్వహణలో మెరుగైన సేవలు అందించడంలో గ్రేటర్ వరంగల్ మున్సిపల్ కార్పొరేషన్ (GWMC) ఎల్లప్పుడూ ముందుంటుందని ఈ సందర్భంగా ఆయన స్పష్టం చేశారు.

ఇళ్ల నుంచి తడి, పొడి చెత్తను వేర్వేరుగా సేకరించడంలో అంకితభావంతో చురుకుగా పనిచేస్తున్న ఇద్దరు స్వచ్ఛ ఆటో డ్రైవర్లను కమిషనర్ ప్రత్యేకంగా అభినందించి సన్మానించారు. పౌరులు అందించే సహకారంతో పాటు క్షేత్రస్థాయిలో కష్టపడి పనిచేస్తున్న సిబ్బందిని ప్రోత్సహించడం ద్వారానే పరిశుభ్రమైన వాతావరణాన్ని సాధించగలమని ఆయన పేర్కొన్నారు. స్వచ్ఛత ఉద్యమంలో ప్రతి ఒక్కరూ భాగస్వాములు కావాలని, నగరంలో చెత్త రహిత వాతావరణాన్ని ఏర్పాటు చేసేందుకు బల్దియా యంత్రాంగం నిరంతరం శ్రమిస్తోందని తెలిపారు.

ఈ కార్యక్రమంలో భాగంగా జీడబ్ల్యూఎంసీ ఇండోర్ స్టేడియంలో పారిశుద్ధ్య కార్మికుల కోసం ఏర్పాటు చేసిన ఉచిత వైద్య శిబిరాన్ని కమిషనర్ టి. వెంకన్న ఘనంగా ప్రారంభించారు. స్మార్ట్ విజన్ ఐ హాస్పిటల్ ఆధ్వర్యంలో కార్మికులకు కంటి పరీక్షలు నిర్వహించడంతో పాటు, యూపీహెచ్‌సీ వైద్య సిబ్బంది ద్వారా రక్త పరీక్షలు మరియు ఇతర ప్రాథమిక ఆరోగ్య పరీక్షలు చేపట్టి ఉచితంగా మందులు పంపిణీ చేశారు. ఈ సందర్భంగా కార్మికులకు హెల్త్ కార్డులను అందజేసిన కమిషనర్, ప్రతి మూడు నెలలకోసారి ప్రత్యేక ఆరోగ్య పరీక్షలు నిర్వహిస్తూ వారి ఆరోగ్య పరిస్థితిని నిరంతరం పర్యవేక్షిస్తామని భరోసా ఇచ్చారు.