షార్ట్‌సర్క్యూట్‌తో ఇల్లు దగ్ధం.. రూ.50 వేల నగదు, వస్తువులు బూడిదపాలు
యాలాల, మేజర్ న్యూస్ (అక్టోబర్ 12): యాలాల మండలం రాస్నం గ్రామంలో విద్యుత్‌ షార్ట్‌సర్క్యూట్‌ కారణంగా కుమ్మరి బుచ్చమ్మకు చెందిన ఇల్లు దగ్ధమైంది. ఈ ప్రమాదంలో ఇంట్లోని వస్తువులతో పాటు దాచుకున్న రూ.50 వేల నగదు కాలిపోయినట్లు బాధితురాలు తెలిపింది. నిరుపేద కుటుంబానికి చెందిన బుచ్చమ్మ పింఛన్‌ డబ్బులను పొదుపు చేసుకొని దాచుకోగా, అగ్నిప్రమాదంలో నగదుతో పాటు విలువైన వస్తువులు బూడిదపాలయ్యాయి. దీంతో ఆమె కుటుంబం తీవ్ర ఇబ్బందుల్లో పడింది.
బాధితురాలిని ఆదుకోవాలని నాయకుల వినతి
అగ్నిప్రమాదంతో సర్వం కోల్పోయిన బుచ్చమ్మను ప్రభుత్వం తక్షణమే ఆదుకోవాలని పలువురు నాయకులు తహసీల్దార్‌ (ఎమ్మార్వో)ను కలిసి వినతిపత్రం సమర్పించారు. బాధితురాలి ఇంటిని క్షేత్రస్థాయిలో పరిశీలించి, జరిగిన నష్టాన్ని అంచనా వేసి ప్రభుత్వ నిబంధనల ప్రకారం ఆర్థిక సాయం అందించాలని కోరారు. నిరుపేద కుటుంబానికి అండగా నిలిచి, తిరిగి జీవనం సాగించేందుకు అవసరమైన సహాయం అందించాలని విజ్ఞప్తి చేశారు.
వివరణ కోరినా స్పందించని ఎమ్మార్వో
బాధితురాలికి ప్రభుత్వ పరంగా అందించే సహాయం, ప్రమాదానికి సంబంధించిన వివరాలపై వివరణ కోరేందుకు రిపోర్టర్ ఎమ్మార్వోకు ఫోన్‌ చేసినప్పటికీ స్పందన రాలేదు. అగ్నిప్రమాదంతో ఆర్థికంగా తీవ్రంగా నష్టపోయిన బుచ్చమ్మ కుటుంబాన్ని సంబంధిత అధికారులు వెంటనే పరామర్శించి, నష్టాన్ని అంచనా వేసి తగిన సహాయం అందించాలని గ్రామస్థులు కోరుతున్నారు. ప్రభుత్వం మానవతా దృక్పథంతో స్పందించి బాధితురాలికి న్యాయం చేయాలని విజ్ఞప్తి చేస్తున్నారు.
రిపోర్టర్:ప్రకాష్ గౌడ్, యాలాల, వికారాబాద్ జిల్లా.
