ప్రజల ప్రాణాలతో చెలగాటం.. నకిలీ వైద్యుడు అరెస్ట్
తిమ్మాయిపల్లిలో ఎస్ఓటీ, వైద్య ఆరోగ్య శాఖ, కీసర పోలీసుల సంయుక్త దాడి
క్లినిక్ సీజ్.. ఔషధాలు, వైద్య పరికరాలు స్వాధీనం
అర్హతలు లేని వైద్యులపై కఠిన చర్యలు తప్పవు: సీఐ బిక్కి రమేష్
కీసర, మేజర్ న్యూస్ (సెప్టెంబర్ 29):
ఎలాంటి వైద్య అర్హతలు లేకుండానే ఆర్ఎంపీ వైద్యుడిగా చలామణి అవుతూ క్లినిక్ నిర్వహిస్తున్న వ్యక్తిని కీసర పోలీసులు అరెస్ట్ చేశారు. మేడ్చల్-మల్కాజిగిరి ప్రత్యేక కార్యాచరణ బృందం (ఎస్ఓటీ), వైద్య ఆరోగ్య శాఖ అధికారులు, కీసర పోలీసులు సంయుక్తంగా మంగళవారం తిమ్మాయిపల్లిలో నిర్వహించిన దాడిలో ఈ వ్యవహారం వెలుగులోకి వచ్చింది.కీసర ఇన్స్పెక్టర్ బిక్కి రమేష్ తెలిపిన వివరాల ప్రకారం.. నిర్మల్ జిల్లాకు చెందిన పత్తిరి తరుణ్ ప్రస్తుతం జవహర్నగర్లో నివాసం ఉంటున్నాడు. ఎలాంటి గుర్తింపు పొందిన వైద్య అర్హతలు లేకపోయినా తిమ్మాయిపల్లి గ్రామంలో ఆర్ఎంపీ వైద్యుడిగా బోర్డు ఏర్పాటు చేసుకుని క్లినిక్ నిర్వహిస్తున్నట్లు పోలీసులకు సమాచారం అందింది. చికిత్స పేరుతో ప్రజల నుంచి డబ్బులు వసూలు చేస్తున్నట్లు వచ్చిన సమాచారంతో అధికారులు సంయుక్తంగా క్లినిక్పై దాడి చేశారు.
క్లినిక్ సీజ్.. కేసు నమోదు
దాడిలో తరుణ్కు ఎలాంటి వైద్య అర్హత ధ్రువపత్రాలు లేవని అధికారులు గుర్తించారు. క్లినిక్లో ఉన్న ఔషధాలు, వైద్య పరికరాలను స్వాధీనం చేసుకున్న పోలీసులు క్లినిక్ను సీజ్ చేశారు. అనంతరం పత్తిరి తరుణ్ను అదుపులోకి తీసుకుని కీసర పోలీస్ స్టేషన్లో కేసు నమోదు చేశారు. ఈ ఘటనపై దర్యాప్తు కొనసాగుతున్నట్లు పోలీసులు తెలిపారు.
కఠిన చర్యలు తప్పవు: సీఐ బిక్కి రమేష్
అర్హతలు లేకుండా వైద్యం చేస్తూ ప్రజల ఆరోగ్యంతో చెలగాటమాడే వారిపై చట్టప్రకారం కఠిన చర్యలు తీసుకుంటామని కీసర ఇన్స్పెక్టర్ బిక్కి రమేష్ హెచ్చరించారు. గ్రామీణ ప్రాంతాల్లో అనుమతులు, వైద్య అర్హతలు లేకుండా క్లినిక్లు నిర్వహిస్తున్న వారి సమాచారం తెలిస్తే వెంటనే పోలీసులకు లేదా వైద్య ఆరోగ్య శాఖ అధికారులకు సమాచారం అందించాలని ప్రజలకు సూచించారు.రిపోర్టర్ కర్రె గణేష్.
