పంటలను ఎండబెట్టి.. రైతులను కాంగ్రెస్ ప్రభుత్వం దగా చేసింది
బీజేపీ రాష్ట్ర అధ్యక్షుడు ఎన్. రామచందర్రావు
నల్గొండ జిల్లా బ్యూరో, మేజర్ న్యూస్:రాష్ట్రంలో కాంగ్రెస్ ప్రభుత్వం అన్నదాతలను మోసం చేసిందని, ప్రభుత్వ వైఫల్యాల కారణంగా వరి పంటలు ఎండిపోయే పరిస్థితి ఏర్పడిందని బీజేపీ తెలంగాణ రాష్ట్ర అధ్యక్షుడు ఎన్. రామచందర్రావు ఆరోపించారు. రైతుల సమస్యలను ప్రత్యక్షంగా తెలుసుకునేందుకు బీజేపీ ప్రతినిధి బృందంతో కలిసి బుధవారం ఆయన నల్గొండ జిల్లాలో పర్యటించారు.
క్షేత్రస్థాయిలో రైతులను కలుసుకుని వారి సమస్యలను తెలుసుకోవడమే పర్యటన ప్రధాన ఉద్దేశమని రామచందర్రావు తెలిపారు. పంటలు నష్టపోయిన రైతుల పరిస్థితులను పరిశీలించి, వారికి బీజేపీ అండగా ఉంటుందని భరోసా ఇచ్చారు.
‘సేవా సంకల్ప్ అభియాన్’లో పాల్గొన్న రాష్ట్ర అధ్యక్షుడు
ప్రధాని నరేంద్ర మోదీ ప్రజా జీవితంలో 25 ఏళ్ల ప్రజాసేవను పూర్తి చేసుకున్న సందర్భంగా ‘సేవా సంకల్ప్ అభియాన్’ నిర్వహిస్తున్నట్లు రామచందర్రావు తెలిపారు. ఇందులో భాగంగా నల్గొండలో నిర్వహించిన కార్యక్రమంలో ఆయన పాల్గొన్నారు. అనంతరం స్వచ్ఛత కార్యక్రమంలో స్వయంగా పాల్గొన్నారు.
సేవా భావం, స్వచ్ఛత విస్తృత ప్రజా ఉద్యమంగా మారాలని ఆయన పిలుపునిచ్చారు. ప్రధాని మోదీ స్ఫూర్తితో ప్రతి బీజేపీ కార్యకర్త సమాజ సేవ, దేశ సేవకు అంకితభావంతో పనిచేయాలని సూచించారు.
నాగార్జునసాగర్లో రైతులతో భేటీ
నల్గొండ పర్యటన అనంతరం రామచందర్రావు నాగార్జునసాగర్కు బయలుదేరారు. అక్కడ పంట నష్టపోయిన రైతులను ప్రత్యక్షంగా కలిసి వారి బాధలు, సమస్యలను అడిగి తెలుసుకోనున్నట్లు తెలిపారు. కష్టాల్లో ఉన్న అన్నదాతలకు భారతీయ జనతా పార్టీ ఎల్లప్పుడూ దృఢంగా అండగా నిలుస్తుందని ఆయన స్పష్టం చేశారు.
