మాదక ద్రవ్యాలపై విద్యార్థులకు అవగాహన కార్యక్రమం

సూర్య,  బెజ్జుర్ :

కొమరం బీమ్ ఆసిఫాబాద్ జిల్లా బెజ్జుర్ మండలం లోని సలుగుపల్లి జెడ్పీహెచ్‌ఎస్‌ఎస్‌ పాఠశాలను బెజ్జూర్ ఎస్సై విజయ్ సందర్శించి విద్యార్థులకు పలు అంశాలపై అవగాహన కల్పించారు. ఈ సందర్భంగా విద్యార్థులతో మాట్లాడిన ఆయన.. జీవితంలో క్రమశిక్షణ ఎంతో ముఖ్యమని, విద్యార్థి దశలోనే మంచి అలవాట్లను అలవర్చుకోవాలని సూచించారు. గంజాయి, గుట్కా, గుడుంబా, మాదక ద్రవ్యాలు వంటి చెడు అలవాట్లకు దూరంగా ఉండాలని, వాటి ప్రభావానికి లోనుకాకుండా చదువుపై పూర్తి దృష్టి పెట్టాలని తెలిపారు. నేటి విద్యార్థులే రేపటి భవిష్యత్తు పౌరులని, ఉన్నత విద్యను అభ్యసించి మంచి ఉద్యోగాలు సాధించేందుకు కృషి చేయాలని సూచించారు. అలాగే 18 సంవత్సరాలు నిండిన వారు మాత్రమే ద్విచక్ర వాహనాలు నడపాలని, మైనర్లు వాహనాలు నడిపి చట్టపరమైన ఇబ్బందుల్లో చిక్కుకోవద్దని హెచ్చరించారు. ఎక్కడైనా మాదక ద్రవ్యాల విక్రయాలు లేదా అసాంఘిక కార్యకలాపాలు జరుగుతున్నట్లు తెలిస్తే వెంటనే 100 నంబర్‌కు సమాచారం అందించాలని ఎస్సై విజయ్ సూచించారు.ఈ కార్యక్రమంలో ప్రధానోపాధ్యాయులు, ఉపాధ్యాయులు, సర్పంచ్ కార్యదర్శి, విద్యార్థులు తదితరులు పాల్గొన్నారు.