లక్ష్మీపతి గూడెంలో మిషన్ భగీరథ నీటి వృథా

జిన్నారం l:మిషన్ భగీరథ ట్యాంకు నుంచి ప్రతిరోజూ నీరు వృథాగా పోతున్నా మున్సిపల్ అధికారులు పట్టించుకోవడం లేదని గడ్డపోతారం మున్సిపాలిటీ పరిధిలోని 17వ వార్డు లక్ష్మీపతి గూడెం గ్రామస్తులు ఆగ్రహం వ్యక్తం చేస్తున్నారు. సిబ్బంది నిర్లక్ష్యం కారణంగా భవిష్యత్తులో నీటి ఎద్దడి తలెత్తే ప్రమాదం ఉందని ఆందోళన వ్యక్తం చేస్తున్నారు. ఒకవైపు ఇంకుడు గుంతలు ఏర్పాటు చేసుకోవాలని అధికారులు ప్రజలకు సూచిస్తుండగా, మరోవైపు మిషన్ భగీరథ ట్యాంకు నుంచి నీరు వృథాగా పోతున్నా అరికట్టేందుకు చర్యలు తీసుకోకపోవడంపై స్థానికులు అసహనం వ్యక్తం చేస్తున్నారు. నీటి సంరక్షణపై అవగాహన కల్పించాల్సిన అధికారులే వృథాను అరికట్టడంలో నిర్లక్ష్యంగా వ్యవహరిస్తున్నారని విమర్శిస్తున్నారు. ఇప్పటికే సకాలంలో వర్షాలు కురవక పంటలు ఎండిపోతున్నాయని, దీనికి తోడు విద్యుత్ కోతలు, తాగునీటి వృథాతో ప్రజలు ఇబ్బందులు ఎదుర్కొంటున్నారని గ్రామస్తులు పేర్కొంటున్నారు. నీటి విలువను గుర్తించి వృథాను అరికట్టాల్సిన అవసరం ఉందని చెబుతున్నారు. ఇప్పటికైనా మున్సిపల్ అధికారులు స్పందించి, ట్యాంకు నుంచి నీరు వృథాగా పోకుండా తగిన చర్యలు తీసుకోవాలని లక్ష్మీపతి గూడెం గ్రామస్తులు కోరుతున్నారు.