నందివాడ మండలంలో వైభవంగా శరన్నవరాత్రి ఉత్సవాలు: తొలిరోజు 'బాలాత్రిపురసుందరి'గా అమ్మవార్ల దర్శనం

నందివాడ మండలంలో వైభవంగా శరన్నవరాత్రి ఉత్సవాలు: తొలిరోజు 'బాలాత్రిపురసుందరి'గా అమ్మవార్ల దర్శనం

నందివాడ, సూర్య ప్రతినిధి :

 నందివాడ మండలవ్యాప్తంగా దేవీ శరన్నవరాత్రి మహోత్సవాలు ఆదివారం నుండి అంగరంగ వైభవంగా ప్రారంభమయ్యాయి. మండలంలోని పలు గ్రామాల్లో వెలసిన అమ్మవారి ఆలయాలన్నీ భక్తుల కోలాహలంతో ఆధ్యాత్మిక రూపాన్ని సంతరించుకున్నాయి. ఉత్సవాల తొలిరోజైన ఆదివారం మండలంలోని ప్రధాన ఆలయాలలో అమ్మవార్లు శ్రీ బాలా త్రిపుర సుందరీ దేవి అలంకారంలో భక్తులకు దివ్య దర్శనమిచ్చారు.

జనార్ధనపురంలో కన్నులపండువగా ఉత్సవాలు:

మండలంలోనే ప్రసిద్ధిగాంచిన జనార్ధనపురం గ్రామంలో వేంచేసియున్న శ్రీ విశ్వేశ్వర స్వామివారి దేవస్థానములో శ్రీదేవి దివ్య శరన్నవరాత్ర మహోత్సవాలు అత్యంత వైభవంగా ప్రారంభమయ్యాయి. స్వస్తిశ్రీ చాంద్రమాన శ్రీ పరాభవనామ సంవత్సర ఆశ్వీయుజ శుద్ధ పాడ్యమిని పురస్కరించుకుని ది. 11-10-2026 ఆదివారం నుండి 20-10-2026 మంగళవారం వరకు పది రోజుల పాటు ఈ ఉత్సవాలు కన్నులపండువగా జరగనున్నాయి.
తొలిరోజు ఆదివారం అమ్మవారు శ్రీ బాలా త్రిపుర సుందరీ దేవి అలంకారంలో భక్తులకు భక్తిభావం పెంపొందేలా దర్శనమిచ్చారు. ఈ సందర్భంగా ఆలయ అర్చకులు స్వర్ణ శివశంకరరావు ఆధ్వర్యంలో శ్రీ స్వామివారికి ప్రత్యేక అభిషేకాలు, శ్రీ అన్నపూర్ణా అమ్మవారికి సహస్రనామ కుంకుమ పూజలు, విశేష అర్చనలు శాస్త్రోక్తంగా నిర్వహించారు. అమ్మవారిని దర్శించుకోవడానికి ఆలయానికి భక్తులు పెద్ద సంఖ్యలో తరలివచ్చారు. దేవస్థానం ఎగ్జిక్యూటివ్ ఆఫీసర్ కె. వి. లక్ష్మి మాట్లాడుతూ.. ఉత్సవాల పది రోజులు నిత్యం స్వామివారికి అభిషేకాలు, అమ్మవారికి కుంకుమ పూజలతో పాటు ప్రతిరోజూ ఒక విశేష అలంకారం ఉంటుందని తెలిపారు. నందివాడ మండల భక్తులందరూ ఈ శరన్నవరాత్రి మహోత్సవాలలో పాల్గొని, స్వామి అమ్మవార్ల తీర్థప్రసాదాలు స్వీకరించి కృపకు పాత్రులు కావాలని కోరారు.

నందివాడ - సూర్య ప్రతినిధి(పాల్)