కోలాహలంగా బతుకమ్మ సంబరాలు
ఆటపాటలతో హోరెత్తిన మునగనూర్ ఎస్ బి హెచ్ కాలనీ.
ఆదిభట్ల సర్కిల్‌ పరిధిలోని తొర్రూర్‌ డివిజన్‌ మునగనూరు ఎస్‌బీహెచ్‌ కాలనీలో బతుకమ్మ సంబరాలు అంగరంగ వైభవంగా జరిగాయి. రంగురంగుల పూలతో పేర్చిన బతుకమ్మల చుట్టూ మహిళలు పెద్ద సంఖ్యలో చేరి, సంప్రదాయ పాటలు పాడుతూ ఉత్సాహంగా నృత్యాలు చేశారు. సంప్రదాయ వస్త్రధారణలో ముస్తాబైన మహిళల ఆటపాటలు, కేరింతలు, బతుకమ్మ పాటలతో కాలనీ మారుమోగింది. ఒకరితో ఒకరు చేతులు కలిపి వలయాకారంగా తిరుగుతూ చేసిన సందడి పండుగకు ప్రత్యేక ఆకర్షణగా నిలిచింది. పూల సోయగాలు, మహిళల ఉత్సాహం, పాటల హోరుతో కాలనీలో ఎటుచూసినా పండుగ కళ ఉట్టిపడింది. తెలంగాణ సంస్కృతి,సంప్రదాయాలకు ప్రతీకగా నిలిచే బతుకమ్మ వేడుకల్లో మహిళలు ఉత్సాహంగా పాల్గొని తమ ఆనందాన్ని పంచుకున్నారు. ఆడపడుచుల ఐక్యతను చాటుతూ సాగిన సంబరాలు కాలనీవాసులను విశేషంగా ఆకట్టుకున్నాయి.
– ఎడ్ల వెంకటేష్‌ గౌడ్, తుర్కయంజాల్, మేజర్ న్యూస్.
