ఐఎంసీ 2026లో రోబోటిక్స్‌తో అదరగొట్టిన యువ శాస్త్రవేత్తలు: 'జెనీవా' గ్లోబల్ ఫైనల్స్‌కు భారత్ తరఫున అర్హత సాధించిన విజేతలు!
సూర్య టెక్నాలజీ & యూత్ డెస్క్: న్యూఢిల్లీలోని యశోభూమి వేదికగా జరిగిన 'ఇండియా మొబైల్ కాంగ్రెస్' లో భారతీయ బాల మేధావులు, యువ ఇన్నోవేటర్లు తమ రోబోటిక్స్ ప్రతిభతో ప్రత్యేక ఆకర్షణగా నిలిచారు. అంతర్జాతీయ టెలికమ్యూనికేషన్ యూనియన్ , డిపార్ట్‌మెంట్ ఆఫ్ టెలికమ్యూనికేషన్స్ , మరియు ఐఐటీ ఢిల్లీకి చెందిన ఐ-హబ్ ఫౌండేషన్ ఫర్ కోబోటిక్స్ సంయుక్తంగా నిర్వహించిన ‘రోబోటిక్స్ ఫర్ గుడ్ యూత్ ఛాలెంజ్ ఇండియా’లో విద్యార్థులు వినూత్న రోబోలను ప్రదర్శించి ఆహూతులను ఆశ్చర్యపరిచారు.
సామాజిక సమస్యల పరిష్కారం, ఆరోగ్య అత్యవసర పరిస్థితులు, మానవతా సంక్షోభాల సహాయక చర్యల కోసం విద్యార్థులు రూపొందించిన రోబోటిక్ నమూనాలు ఎంతగానో ఆకట్టుకున్నాయి. ఈ పోటీలలో జూనియర్ కేటగిరీలో ‘టీమ్ సింగులారిటీ’ , సీనియర్ కేటగిరీలో ‘టీమ్ ఫెర్రమ్ ఇంక్యుబేటర్స్’ విజేతలుగా నిలిచారు. ఈ రెండు జట్లు స్విట్జర్లాండ్‌లోని జెనీవాలో 2027లో జరగనున్న ప్రతిష్టాత్మక 'ఏఐ ఫర్ గుడ్ గ్లోబల్ సమ్మిట్' గ్రాండ్ ఫైనల్స్‌లో భారత్‌కు ప్రాతినిధ్యం వహించే అరుదైన అవకాశాన్ని దక్కించుకున్నాయి.
ఖరీదైన పరికరాలు లేకపోయినా ఓపెన్ సోర్స్ సాఫ్ట్‌వేర్, హార్డ్‌వేర్ ఆధారంగా అద్భుతమైన ఆవిష్కరణలను సాకారం చేయవచ్చని ఈ యువ ఆవిష్కర్తలు నిరూపించారు. ఐఐటీ ఢిల్లీ ఐహెచ్‌ఎఫ్‌సీ వీరికి అంతర్జాతీయ వేదిక కోసం తగిన మెంటార్‌షిప్ అందించనుంది. యువత ఆలోచనలు, కృత్రిమ మేధ, రోబోటిక్స్ రంగంలో భారత సాంకేతిక భవిష్యత్తుకు బలమైన పునాది వేస్తున్నాయని ఈ సందర్భంగా ఐటీయూ ఉన్నతాధికారులు ప్రశంసించారు.
