హూతీల దాడిపై..సౌదీ అరేబియా, తుర్కియే, ఈజిప్ట్, పాకిస్థాన్ తీవ్ర ఖండన

సూర్య అంతర్జాతీయ డెస్క్: సౌదీ అరేబియా రాజధాని రియాద్‌లోని కింగ్ ఖాలిద్ అంతర్జాతీయ విమానాశ్రయం లక్ష్యంగా యెమెన్‌కు చెందిన హూతీ మిలిటెంట్లు జరిపిన విధ్వంసకర దాడిని సౌదీ అరేబియాతో పాటు తుర్కియే, ఈజిప్ట్, పాకిస్థాన్ దేశాలు ఉమ్మడిగా తీవ్రంగా ఖండించాయి. నిరపరాధ పౌరుల ప్రాణాలను బలిగొంటూ, ప్రాంతీయ ప్రాంతీయ భద్రతకు తీవ్ర విఘాతం కలిగిస్తున్న ఈ దాడులకు హూతీ తిరుగుబాటుదారులే పూర్తి బాధ్యత వహించాలని నాలుగు దేశాల విదేశాంగ మంత్రిత్వ శాఖలు సంయుక్త ప్రకటనలో స్పష్టం చేశాయి.

గత శని, ఆదివారాల్లో రియాద్ విమానాశ్రయ టెర్మినల్‌పై జరిగిన ఈ దాడిలో దాదాపు 13 మంది ప్రాణాలు కోల్పోగా, 300 మందికి పైగా తీవ్రంగా గాయపడ్డారు. ఈ ఘటన అంతర్జాతీయ చట్టాలు మరియు సౌదీ అరేబియా సార్వభౌమాధికారాన్ని తీవ్రంగా ఉల్లంఘించడమేనని నాలుగు దేశాలు తీవ్ర ఆగ్రహం వ్యక్తం చేశాయి. హూతీలు వెంటనే తమ సాయుధ దాడులను బేషరతుగా నిలిపివేయాలని, లేకపోతే ఉత్పన్నమయ్యే తీవ్ర పరిణామాలను ఎదుర్కోవాల్సి ఉంటుందని హెచ్చరించాయి. సౌదీ అరేబియా తన జాతీయ భద్రతను, పౌరులను కాపాడుకునేందుకు తీసుకునే అన్ని రకాల ప్రతిఘటన చర్యలకు పూర్తి మద్దతు ఇస్తున్నట్లు సదరు దేశాలు పునరుద్ఘాటించాయి.

ఈ ఘటనతో రియాద్ విమానాశ్రయంలో విమానాల రాకపోకలను తాత్కాలికంగా నిలిపివేయాల్సి వచ్చింది. కాగా, మధ్యప్రాచ్యంలో ముదురుతున్న యుద్ధ మేఘాల నేపథ్యంలో సౌదీపై జరుగుతున్న ఈ దాడులపై అమెరికా సైతం తీవ్రంగా స్పందించింది. హూతీ తిరుగుబాటుదారులపై సౌదీ అరేబియా చేపడుతున్న మిలిటరీ చర్యల్లో అమెరికా కూడా నేరుగా భాగస్వామ్యం అయ్యే విషయాన్ని పరిశీలిస్తున్నట్లు అధ్యక్షుడు డొనాల్డ్ ట్రంప్ వెల్లడించారు. అంతర్జాతీయంగా చమురు సరఫరా మరియు కీలక విమాన రవాణా మార్గాలపై ఈ దాడులు ప్రతికూల ప్రభావం చూపుతాయని భయాందోళనలు వ్యక్తమవుతున్నాయి.