కరెంటు కోతలతో ఎండుతున్న వరి

అధికారులు స్పందించాలంటూ.. బిజెపి మండలాధ్యక్షులు వడ్ల అరవింద్ చారి డిమాండ్ 

 రైతు సంక్షేమ ప్రభుత్వంగా చెప్పుకుంటున్న కాంగ్రెస్ ప్రభుత్వం వేళాపాళా లేని కరెంట్ కోతలతో అన్నదాతల కుటుంబాలను ఆందోళనకు గురిచేస్తున్నదని భారతీయ జనతాపార్టీ నందిగామ మండలాధ్యక్షులు వడ్ల అరవింద్ చారి ఆరోపించారు.వ్యవసాయరంగానికి 24గంటల ఉచిత విద్యుత్తు ఇవ్వాల్సిన రాష్ట్ర ప్రభుత్వ అసమర్ధ విధానాలతో ఉదయం నుండి సాయంత్రం వరకు మాత్రమే విద్యత్తు సరఫరా చేస్తుండడంతో నీరు సరిపోక పొట్టకొచ్చిన వరి పంటలు ఎండిపోతున్నాయని ఆయన ఆవేదన వ్యక్తం చేశారు. లక్షల రూపాయల పెట్టుబడులు పెట్టి సాగు చేసిన పంటలు నీరు లేక తమ కళ్ళముందే ఎండిపోతుండడం చూసి రైతన్నల కుటుంబాలు దిక్కుతోచని స్థితిలో కొట్టుమిట్టాడుతున్నాయని అరవింద్ చారి విచారం వ్యక్తం చేశారు. రాష్ట్ర ప్రభుత్వం తక్షణమే స్పందించి ప్రత్యామ్నాయ చర్యలతో వ్యవసాయరంగానికి 24గంటల నిరంతర విద్యుత్తును సరఫరా చేసి రైతన్నలను ఆదుకోవాలని డిమాండ్ చేశారు. ఈ మేరకు గురువారం ఉదయం నందిగామ మండలం నర్సప్పగూడ శివారులో కరెంట్ కోతలతో నీరు లేక ఎండిన వరిపంటలను రైతులతో కలిసి అరవింద్ చారి పరిశీలించారు.

- కావలి ప్రభాకర్ : మేజర్ న్యూస్, నందిగామ.