హైదరాబాద్ నగర ప్రయాణికులకు బిగ్ అప్‌డేట్

హైదరాబాద్, సూర్య ప్రధాన ప్రతినిధి :భాగ్యనగర వాసుల ప్రయాణాలను మరింత సులభతరం చేసేందుకు తెలంగాణ ప్రభుత్వం మరో కీలక అడుగు వేసింది. హైదరాబాద్‌లోని మెట్రో రైళ్లు మరియు ఆర్టీసీ సిటీ బస్సుల్లో ప్రయాణించేందుకు వీలుగా ఉమ్మడి కామన్ పాస్ 'మీ టికెట్' సౌకర్యాన్ని నేటి నుంచి అందుబాటులోకి తీసుకువచ్చింది. ఉప ముఖ్యమంత్రి భట్టి విక్రమార్క అధికారులతో కలిసి ఈ నూతన రవాణా పాస్‌లను అధికారికంగా ప్రారంభించనున్నారు.

ఈ పథకం కింద రోజువారీ మరియు నెలవారీ ప్రాతిపదికన కామన్ పాస్‌లను నిర్ణయించారు. రోజువారీ కామన్ పాస్ ధరను మెట్రో రవాణాకు రూ.300, ఆర్టీసీ ప్రయాణానికి రూ.100 చొప్పున మొత్తం రూ.400గా ఖరారు చేశారు. అలాగే ప్రతి నెలా క్రమం తప్పకుండా ప్రయాణించే ఉద్యోగులు, విద్యార్థుల కోసం నెలవారీ కామన్ పాస్ ధరను మెట్రో వాటా రూ.7,000, ఆర్టీసీ వాటా రూ.1,500 కలిపి మొత్తం రూ.8,500గా నిర్ణయించారు. ఒకే పాస్‌తో రెండు ప్రముఖ రవాణా వ్యవస్థల్లో ప్రయాణించే వెసులుబాటు కలగడంతో ప్రయాణికుల నుంచి హర్షం వ్యక్తమవుతోంది.