కాంగ్రెస్ పార్టీకి మండల ఉపాధ్యక్షుడు రాజీనామా

కాంగ్రెస్ పార్టీకి మండల ఉపాధ్యక్షుడు సయ్యద్ అజీజ్   రాజీనామా

18 ఏళ్లుగా పనిచేసినా గుర్తింపు లభించలేదని ఆవేదన

 కాంగ్రెస్ పార్టీలో గత 18 ఏళ్లుగా వివిధ హోదాల్లో పనిచేసినప్పటికీ తగిన గుర్తింపు లభించడం లేదని ఆవేదన వ్యక్తం చేస్తూ, కందుకూరు మండల కాంగ్రెస్ పార్టీ ఉపాధ్యక్షుడు పార్టీకి, పార్టీ సభ్యత్వానికి రాజీనామా చేస్తున్నట్లు ప్రకటించారు. తన రాజీనామా లేఖను మహేశ్వరం నియోజకవర్గ కాంగ్రెస్ పార్టీ ఇన్‌చార్జి కిచెన్నగారి లక్ష్మారెడ్డి (కేఎల్ఆర్)కు సమర్పించారు.ఈ సందర్భంగా ఆయన మాట్లాడుతూ.. కాంగ్రెస్ పార్టీ కార్యకర్తగా ప్రస్థానం ప్రారంభించి, ఐదేళ్లపాటు మండల మైనార్టీ కార్యదర్శిగా, నాలుగేళ్లపాటు మండల మైనార్టీ ఉపాధ్యక్షుడిగా, ఆరేళ్లపాటు మైనార్టీ చైర్మన్‌గా బాధ్యతలు నిర్వహించినట్లు తెలిపారు. పార్టీ జయంతి, వర్ధంతి కార్యక్రమాలతో పాటు ధర్నాలు, సభలు, ఇతర పార్టీ కార్యక్రమాల్లో చురుకుగా పాల్గొన్నానని పేర్కొన్నారు. పార్టీ కోసం పనిచేసిన క్రమంలో తనపై పోలీసు కేసులు కూడా నమోదయ్యాయని, కోర్టుల చుట్టూ తిరగాల్సి వస్తోందని ఆవేదన వ్యక్తం చేశారు.
పదవుల విషయంలో అన్యాయం జరిగిందని ఆరోపణ
పార్టీ కోసం ఇన్నేళ్లు పనిచేసినా తనకు తగిన పదవి, గుర్తింపు లభించలేదని ఆయన ఆరోపించారు. కొంత మంది నాయకులు తనకు పార్టీ పదవులు దక్కకుండా అడ్డుకుంటున్నారని ఆరోపిస్తూ, గ్రామస్థాయి నుంచి జిల్లా, రాష్ట్రస్థాయి నాయకుల వరకు తన సమస్యను తీసుకెళ్లినా పరిష్కారం లభించలేదని తెలిపారు.
పార్టీలో నిరంతరం సేవలందించినప్పటికీ గుర్తింపు లభించకపోవడంతో మనస్తాపానికి గురై రాజీనామా నిర్ణయం తీసుకున్నట్లు వివరించారు. తన రాజీనామాను ఆమోదించాలని కిచెన్నగారి లక్ష్మారెడ్డిని కోరారు.

టి. శ్రీనివాస్ :మేజర్ న్యూస్, కందుకూరు