హుస్నాబాద్‌లో మొదలైన ఎంగిలిపూల బతుకమ్మ సంబరాలు!
హుస్నాబాద్ :తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగ సంబరాలు హుస్నాబాద్ పట్టణంలో ఘనంగా ప్రారంభమయ్యాయి. బతుకమ్మ పండుగలో మొదటి రోజైన ఎంగిలిపూల బతుకమ్మ సందర్భంగా మహిళలు ఉత్సాహంగా వేడుకల్లో పాల్గొని ఆటపాటలతో సందడి చేశారు.రంగురంగుల పూలతో బతుకమ్మలను అందంగా పేర్చి, సంప్రదాయ దుస్తులు ధరించిన మహిళలు ఒకచోట చేరి బతుకమ్మ పాటలు పాడుతూ కోలాటాలు, ఆటపాటలతో ఆనందంగా గడిపారు. ప్రకృతిని పూజించే ఈ పండుగ తెలంగాణ ఆడపడుచుల ఆత్మీయతకు, ఐక్యతకు, సంస్కృతీ సంప్రదాయాలకు అద్దం పడుతోంది.తీరొక్క పూలతో అలంకరించిన బతుకమ్మలు పట్టణంలో పండుగ శోభను సంతరించుకున్నాయి. ప్రతి ఇంటా పండుగ వాతావరణం నెలకొనగా, మహిళలు భక్తిశ్రద్ధలతో బతుకమ్మను పూజించి రాష్ట్రం సుభిక్షంగా ఉండాలని, ప్రజలందరూ సుఖసంతోషాలతో వర్ధిల్లాలని ఆకాంక్షించారు.తొమ్మిది రోజుల పాటు జరిగే బతుకమ్మ వేడుకల్లో భాగంగా మొదటి రోజే మహిళల్లో ఉత్సాహం వెల్లివిరిసింది. తెలంగాణ అస్తిత్వానికి ప్రతీకగా నిలిచే బతుకమ్మ పండుగను సంప్రదాయబద్ధంగా జరుపుకునేందుకు మహిళలు సిద్ధమయ్యారు.
