గణేశ్ నిమజ్జన వేళ దక్షిణ మధ్య రైల్వే గుడ్న్యూస్: రాత్రంతా ప్రత్యేక ఎంఎంటీఎస్ రైళ్లు
సూర్య తెలంగాణ డెస్క్: భాగ్యనగరంలో అత్యంత వైభవంగా జరిగే వినాయక నిమజ్జనోత్సవాల సందర్భంగా భక్తులకు దక్షిణ మధ్య రైల్వే (SCR) గొప్ప ఊరటనిచ్చింది. నిమజ్జన వేడుకలకు తరలివచ్చే లక్షలాది మంది భక్తులకు రవాణా పరంగా ఎలాంటి అసౌకర్యం కలగకుండా ఉండేందుకు రాత్రంతా ప్రత్యేక ఎంఎంటీఎస్ (MMTS) రైళ్లను నడపనున్నట్లు ప్రకటించింది.
మూడు రోజుల పాటు ప్రత్యేక సర్వీసులు
వినాయక నిమజ్జన రద్దీని దృష్టిలో ఉంచుకుని ఈ నెల 25 నుంచి 27వ తేదీ వరకు రాత్రి వేళల్లో ఈ ప్రత్యేక రైళ్లు అందుబాటులో ఉండనున్నాయి. రోజూ రాత్రి 11:00 గంటల నుంచి తెల్లవారుజామున 5:00 గంటల మధ్య ఈ సర్వీసులు నడుస్తాయని దక్షిణ మధ్య రైల్వే సీపీఆర్ఓ ఎ. శ్రీధర్ తెలిపారు. నగరంలోని ప్రధాన ప్రాంతాలైన సికింద్రాబాద్, నాంపల్లి, లింగంపల్లి, ఫలక్నుమా మార్గాల్లో మొత్తం 8 ప్రత్యేక ఎంఎంటీఎస్ రైళ్లు రాకపోకలు సాగించనున్నాయి.
ప్రధాన రైళ్ల సమయాలు ఇలా ఉన్నాయి:
జీఎస్హెచ్-1: సికింద్రాబాద్ నుంచి రాత్రి 23:50 గంటలకు బయలుదేరి నాంపల్లికి 00:20 గంటలకు చేరుకుంటుంది.
జీహెచ్ఎల్-2: నాంపల్లి నుంచి 00:30 గంటలకు బయలుదేరి లింగంపల్లికి 01:20 గంటలకు చేరుకుంటుంది.
జీఎల్హెచ్-3: లింగంపల్లి నుంచి 01:50 గంటలకు బయలుదేరి నాంపల్లికి 02:40 గంటలకు చేరుకుంటుంది.
జీహెచ్ఎస్-4: నాంపల్లి నుంచి 03:30 గంటలకు బయలుదేరి సికింద్రాబాద్కు 04:00 గంటలకు చేరుకుంటుంది.
జీహెచ్ఎల్-5: నాంపల్లి నుంచి 23:10 గంటలకు బయలుదేరి లింగంపల్లికి 23:55 గంటలకు చేరుకుంటుంది.
జీఎల్ఎఫ్-6: లింగంపల్లి నుంచి 00:10 గంటలకు బయలుదేరి ఫలక్నుమాకు 01:50 గంటలకు చేరుకుంటుంది.
జీఎఫ్ఎస్-7: ఫలక్నుమా నుంచి 02:20 గంటలకు బయలుదేరి సికింద్రాబాద్కు 03:00 గంటలకు చేరుకుంటుంది.
జీఎస్హెచ్-8: సికింద్రాబాద్ నుంచి తెల్లవారుజామున 04:00 గంటలకు బయలుదేరి నాంపల్లికి 04:40 గంటలకు చేరుకుంటుంది.
సెప్టెంబర్ 25 శుక్రవారం నాడు ప్రధాన గణేశ్ నిమజ్జన సామూహిక ఊరేగింపు జరగనున్న నేపథ్యంలో, భక్తులు ఈ ప్రత్యేక రైళ్ల సేవలను సద్వినియోగం చేసుకోవాలని రైల్వే అధికారులు కోరారు. మరోవైపు నిమజ్జనం ప్రశాంత వాతావరణంలో జరిగేలా నగర పోలీస్ కమిషనర్ ఆధ్వర్యంలో భారీ బందోబస్తు ఏర్పాట్లు చేశారు.
