శ్రీవారి బ్రహ్మోత్సవాలు విజయవంతంగా ముగిశాయి

*8 రోజుల్లో 5.76 లక్షల మంది భక్తుల దర్శనం.. హుండీ ఆదాయం రూ.28.94 కోట్లు

తిరుమల: తిరుమల శ్రీవారి వార్షిక బ్రహ్మోత్సవాలు విజయవంతంగా ముగిశాయి. టీటీడీ అధికారులు, సిబ్బంది, పోలీసులు, భద్రతా విభాగాలు, ఇతర శాఖల సమిష్టి కృషితో బ్రహ్మోత్సవాలను ఎలాంటి అవాంతరాలు లేకుండా నిర్వహించినట్లు టీటీడీ చైర్మన్‌ బీఆర్‌ నాయుడు తెలిపారు.

బ్రహ్మోత్సవాల సందర్భంగా 8 రోజుల్లో 5.76 లక్షల మంది భక్తులు శ్రీవారిని దర్శించుకున్నారు. భక్తుల నుంచి శ్రీవారి హుండీ ద్వారా రూ.28.94 కోట్ల ఆదాయం సమకూరింది.

బ్రహ్మోత్సవాల సమయంలో భక్తులకు విస్తృతంగా అన్నప్రసాదాలను అందించారు. మొత్తం 21.84 లక్షల అన్నప్రసాదాలను పంపిణీ చేశారు. అలాగే 2.04 లక్షల మంది భక్తులు తలనీలాలు సమర్పించారు.

శ్రీవారి లడ్డూ ప్రసాదానికి కూడా భారీ డిమాండ్‌ ఏర్పడింది. బ్రహ్మోత్సవాల సందర్భంగా మొత్తం 33 లక్షల లడ్డూలు విక్రయించారు.

భక్తులకు దర్శనం, వసతి, అన్నప్రసాదం, తలనీలాల సమర్పణ, లడ్డూ ప్రసాదం తదితర సేవల్లో ఎలాంటి ఇబ్బందులు తలెత్తకుండా టీటీడీ విస్తృత ఏర్పాట్లు చేసింది. అధికారుల సమన్వయం, సిబ్బంది సేవలు, భక్తుల సహకారంతో బ్రహ్మోత్సవాలు దిగ్విజయంగా పూర్తయ్యాయని బీఆర్‌ నాయుడు పేర్కొన్నారు.