అమరావతిలో ఎల్వీ ప్రసాద్ కంటి వైద్య సంస్థకు భూమిపూజ
*12 ఎకరాల్లో సుధా–వెంకట్ జాస్తి క్యాంపస్.. ఏటా 3 లక్షల మందికి కంటి వైద్య పరీక్షలు
అమరావతి: రాజధాని అమరావతిలో ఎల్వీ ప్రసాద్ కంటి వైద్య సంస్థకు భూమిపూజ జరిగింది. అబ్బరాజుపాలెంలో ముఖ్యమంత్రి చంద్రబాబు నాయుడు సంస్థ క్యాంపస్కు శంకుస్థాపన చేశారు.
12 ఎకరాల విస్తీర్ణంలో సుధా–వెంకట్ జాస్తి క్యాంపస్ను ఏర్పాటు చేయనున్నారు. ఈ కేంద్రం ద్వారా ఏడాదికి సుమారు 3 లక్షల మందికి కంటి వైద్య పరీక్షలు నిర్వహించేలా ఏర్పాట్లు చేయనున్నట్లు తెలిపారు. అలాగే కంటి వైద్యంతో పాటు కంటి, మెదడు సంబంధిత వైద్య సేవల కేంద్రాన్ని ఏర్పాటు చేసేందుకు సంస్థ ముందుకొచ్చిందని చంద్రబాబు పేర్కొన్నారు.
ఈ సందర్భంగా సీఎం చంద్రబాబు మాట్లాడుతూ.. అమరావతి పేరు ఇప్పుడు దేశవ్యాప్తంగా మార్మోగుతోందని అన్నారు. రాజధానిలో ఆధునిక వైద్య సంస్థలు, విద్యా సంస్థలు ఏర్పాటవుతుండటం ద్వారా అమరావతి అభివృద్ధికి మరింత ఊతం లభిస్తుందని పేర్కొన్నారు.
