ఏడేళ్ల తర్వాత ఇంటికి చేరిన మహేందర్

శారద ఫౌండేషన్ సేవలతో కుటుంబ సభ్యుల చెంతకు..
సూర్య వీణవంక: కరీంనగర్ జిల్లా వీణవంక మండలం గన్ముకుల గ్రామానికి చెందిన బొంగోని మహేందర్ మతిస్థిమితం కోల్పోయి సుమారు ఏడేళ్ల క్రితం గ్రామం నుంచి వెళ్లిపోయాడు. అప్పటి నుంచి కుటుంబ సభ్యులు పలుచోట్ల గాలించినప్పటికీ అతని ఆచూకీ లభించకపోవడంతో తీవ్ర ఆవేదనకు గురయ్యారు.ఈ క్రమంలో గురువారం ఉదయం మహారాష్ట్ర నుంచి మహేందర్ తన స్వగ్రామానికి చేరుకోవడంతో కుటుంబ సభ్యులు, గ్రామస్తులు ఆనందం వ్యక్తం చేశారు. గత ఏడేళ్లుగా మహేందర్‌కు శారద ఫౌండేషన్ ప్రతినిధులు ఆశ్రయం కల్పిస్తూ అవసరమైన చికిత్స, సంరక్షణ అందించినట్లు కుటుంబ సభ్యులు తెలిపారు. ఫౌండేషన్ సేవలతో మహేందర్ కోలుకుని సాధారణ స్థితికి చేరుకోవడంతో కుటుంబ సభ్యులకు అప్పగించారు.ఏళ్ల తర్వాత మహేందర్‌ను చూసిన కుటుంబ సభ్యులు భావోద్వేగానికి లోనయ్యారు. అతడిని కుటుంబానికి తిరిగి చేర్చడంలో సేవలందించిన శారద ఫౌండేషన్ ప్రతినిధులకు కుటుంబ సభ్యులు, గ్రామస్తులు కృతజ్ఞతలు తెలిపారు. ఫౌండేషన్ సభ్యులను ఘనంగా సన్మానించి వారి సేవలను అభినందించారు.