సూర్య, చింతలమానేపల్లి : వైగాం గ్రామానికి చెందిన చెరువు తూము వద్ద ఏర్పాటు చేసిన పెద్ద కట్టను తొలగించి, తమ పంట పొలాలకు సాగునీరు అందేలా చర్యలు తీసుకోవాలని రణవెళ్లి గ్రామానికి చెందిన రైతులు డిమాండ్ చేస్తున్నారు. ఈ మేరకు రైతులు వైగాం చెరువు వద్దకు వెళ్లి తమ ఆవేదనను వ్యక్తం చేస్తూ నిరసన తెలిపారు.ప్రతి సంవత్సరం వైగాం చెరువు నుంచి వచ్చే నీరు వాగు ద్వారా తమ పంట పొలాలకు చేరుతుందని రైతులు తెలిపారు. ఈ చెరువులో సుమారు వెయ్యి ఎకరాలకు సరిపడా నీరు ఉన్నప్పటికీ, తూము వద్ద పెద్ద కట్ట నిర్మించడంతో రణవెళ్లి, టేకంగూడ గ్రామాలకు నీరు చేరడం లేదని వారు ఆవేదన వ్యక్తం చేశారు.దీంతో రణవెళ్లి, టేకంగూడ, బూరెపల్లి గ్రామాలకు చెందిన రైతులు సాగునీటి విషయంలో తీవ్ర ఇబ్బందులు ఎదుర్కొనే పరిస్థితి నెలకొందని ఆందోళన వ్యక్తం చేస్తున్నారు. సాగునీరు అందకపోతే పంటలకు నష్టం వాటిల్లే ప్రమాదం ఉందని పేర్కొంటున్నారు.సంబంధిత అధికారులు వెంటనే స్పందించి, తూము వద్ద ఏర్పాటు చేసిన కట్టను పరిశీలించి, నిబంధనల ప్రకారం తగిన చర్యలు తీసుకోవాలని రైతులు కోరుతున్నారు. మూడు గ్రామాల రైతులకు సాగునీరు అందేలా చర్యలు చేపట్టి తమ పంటలను కాపాడాలని రైతులు కోరుతున్నారు.
