భూసేకరణపై రేపు గ్రామసభలు.. రైతులు అభిప్రాయాలు తెలపాలి: తహసీల్దార్ పద్మావతి

బొంరాస్‌పేట్, మేజర్ న్యూస్: మక్తల్–నారాయణపేట–కొడంగల్ ఎత్తిపోతల పథకంలో భాగంగా చేపట్టనున్న భూసేకరణపై ప్రజాభిప్రాయ సేకరణ కోసం శుక్రవారం గ్రామసభలు నిర్వహించనున్నట్లు తహసీల్దార్ పద్మావతి తెలిపారు. ఈ మేరకు గురువారం ఆమె ఒక ప్రకటన విడుదల చేశారు.బొంరాస్‌పేట్ గ్రామ రైతు వేదికలో శుక్రవారం ఉదయం 10 గంటలకు, నాందర్‌పూర్ గ్రామ ప్రభుత్వ పాఠశాల ఆవరణలో ఉదయం 11.30 గంటలకు గ్రామసభలు నిర్వహించనున్నట్లు పేర్కొన్నారు. కాలువ నిర్మాణం వల్ల భూములు కోల్పోతున్న రైతులు ఈ గ్రామసభలకు హాజరై తమ అభిప్రాయాలు, సూచనలను సంబంధిత అధికారులకు తెలియజేయాలని తహసీల్దార్ పద్మావతి సూచించారు.భూసేకరణకు సంబంధించిన అంశాలపై రైతులు తమ అభిప్రాయాలను అధికారుల దృష్టికి తీసుకెళ్లేందుకు గ్రామసభలు ఉపయోగపడతాయని తెలిపారు. కావున ఆయా రెవెన్యూ గ్రామాల పరిధిలోని కాలువ ప్రభావిత రైతులందరూ నిర్ణీత సమయానికి హాజరై గ్రామసభల్లో పాల్గొనాలని తహసీల్దార్ పద్మావతి విజ్ఞప్తి చేశారు.