కాంట్రాక్ట్ అధ్యాపకులను రెగ్యులర్ చేయాలి

సూర్య, తెలంగాణ బ్యూరో ప్రతినిధిః తెలంగాణ రాష్ట్రంలోని 12 విశ్వవిద్యాలయాల్లో పనిచేస్తున్న సుమారు 1,200 మంది కాంట్రాక్ట్ అసిస్టెంట్ ప్రొఫెసర్లను రెగ్యులరైజ్ చేయాలని డిమాండ్ చేస్తూ వందలాది మంది అధ్యాపకులు గురువారం హైదరాబాద్‌లో భారీ ధర్నా నిర్వహించారు. ‘చలో హైదరాబాద్’ పిలుపులో భాగంగా వివిధ విశ్వవిద్యాలయాల నుంచి తరలివచ్చిన అధ్యాపకులు హయ్యర్ ఎడ్యుకేషన్ కౌన్సిల్ కార్యాలయాన్ని ముట్టడించారు. ముఖ్యమంత్రి రేవంత్‌రెడ్డి గతంలో ఇచ్చిన హామీని వెంటనే అమలు చేయాలని, ఉద్యోగ భద్రత కల్పించడంతో పాటు యూజీసీ ఏడో పీఆర్సీ వేతనాలను అమలు చేయాలని నినదించారు. ఈ ధర్నాలో పాల్గొన్న రాజ్యసభ సభ్యుడు, జాతీయ బీసీ సంక్షేమ సంఘం అధ్యక్షుడు ఆర్. కృష్ణయ్య మాట్లాడుతూ.. రెండు మూడు దశాబ్దాలుగా విశ్వవిద్యాలయాల్లో విద్యాబోధన, పరిశోధన, పరిపాలనా బాధ్యతలు నిర్వహిస్తున్న కాంట్రాక్ట్ అధ్యాపకుల పట్ల ప్రభుత్వం న్యాయం చేయాలని డిమాండ్ చేశారు. గతంలో ముఖ్యమంత్రి ఇచ్చిన హామీ మేరకు వారి ఉద్యోగాలను క్రమబద్ధీకరించాలని, రెగ్యులర్ అధ్యాపకులతో సమానంగా వేతనాలు చెల్లించాలని కోరారు.

11 రోజుల సమ్మె చేసినా నెరవేరని హామీ

గత ఏడాది ఏప్రిల్‌లో 12 విశ్వవిద్యాలయాల కాంట్రాక్ట్ అసిస్టెంట్ ప్రొఫెసర్లు ఉద్యోగ భద్రత, ఏడో పీఆర్సీ వేతనాల అమలు తదితర డిమాండ్లతో 11 రోజుల పాటు నిరవధిక సమ్మె నిర్వహించారని ఆర్. కృష్ణయ్య గుర్తుచేశారు. ఈ సమ్మె కారణంగా విశ్వవిద్యాలయాల్లో విద్యాబోధనకు అంతరాయం ఏర్పడిందన్నారు. ఆ సమయంలో ముఖ్యమంత్రి స్పందిస్తూ కాంట్రాక్ట్ అధ్యాపకులకు ఉద్యోగ భద్రత కల్పించడంతో పాటు రెగ్యులర్ అధ్యాపకులతో సమానంగా వేతనాలు చెల్లిస్తామని హామీ ఇవ్వడంతో వారు సమ్మె విరమించారని తెలిపారు. అయితే నేటికీ ఆ హామీలు అమలుకు నోచుకోలేదని విమర్శించారు.

రిక్రూట్‌మెంట్‌తో 1,200 మంది భవిష్యత్తుకు ముప్పు

విశ్వవిద్యాలయాల్లో ఖాళీగా ఉన్న అధ్యాపక పోస్టుల భర్తీకి ప్రభుత్వం తాజాగా జీవో నంబర్ 31 జారీ చేయడంపై ఆర్. కృష్ణయ్య ఆందోళన వ్యక్తం చేశారు. ముందుగా 20 నుంచి 30 సంవత్సరాలుగా సేవలందిస్తున్న 1,200 మంది కాంట్రాక్ట్ అధ్యాపకులకు ఉద్యోగ భద్రత కల్పించి, వారిని రెగ్యులర్ అధ్యాపకులుగా విలీనం చేసిన తర్వాతే మిగిలిన ఖాళీల భర్తీ చేపట్టాలని స్పష్టం చేశారు. రిక్రూట్‌మెంట్ పేరుతో సుదీర్ఘకాలంగా పనిచేస్తున్న కాంట్రాక్ట్ అధ్యాపకులను పక్కనపెడితే వారి కుటుంబాలు రోడ్డున పడే ప్రమాదం ఉందన్నారు. పని భారం లేదనే కారణంతో కొందరు ఉపకులపతులు వారిని విధుల నుంచి తొలగించే అవకాశం ఉందని ఆందోళన వ్యక్తం చేశారు. రాష్ట్రంలోని సుమారు 3 వేల ఖాళీల్లో 1,200 మంది కాంట్రాక్ట్ అధ్యాపకులను కొనసాగించడం ప్రభుత్వానికి భారమేమీ కాదని పేర్కొన్నారు.

విద్యా కమిషన్ సిఫారసులను అమలు చేయాలి

యూజీసీ నిబంధనల ప్రకారం నెట్, సెట్, పీహెచ్‌డీ, పోస్ట్ డాక్టోరల్ ఫెలోషిప్, జూనియర్ రీసెర్చ్ ఫెలోషిప్ వంటి అర్హతలతో పాటు బోధన, పరిశోధన, పరిపాలన రంగాల్లో అనుభవం కలిగిన అధ్యాపకులు విశ్వవిద్యాలయాల్లో సేవలందిస్తున్నారని ఆర్. కృష్ణయ్య తెలిపారు. శాశ్వత అధ్యాపకులతో సమానంగా విద్యార్థులకు బోధన అందిస్తున్న వారి సేవలను గుర్తించాలని కోరారు. తెలంగాణ విద్యా కమిషన్ సైతం అర్హత కలిగిన కాంట్రాక్ట్ అధ్యాపకులను రెగ్యులర్ అధ్యాపకులుగా విలీనం చేయాలని ప్రభుత్వానికి సిఫారసు చేసిందని పేర్కొన్నారు. ఈ సిఫారసులను వెంటనే అమలు చేసి, అర్హులైన అధ్యాపకులను సేవల్లో విలీనం చేయాలని డిమాండ్ చేశారు.

సుప్రీంకోర్టు తీర్పులకు అనుగుణంగా చర్యలు తీసుకోవాలి

సుప్రీంకోర్టు గతంలో వెలువరించిన తీర్పులకు అనుగుణంగా కాంట్రాక్ట్ అధ్యాపకుల సేవలను క్రమబద్ధీకరించేందుకు ప్రభుత్వం చర్యలు తీసుకోవాలని ఆర్. కృష్ణయ్య కోరారు. రెగ్యులరైజేషన్ లేదా విలీనం ప్రక్రియ పూర్తయ్యే వరకు వారికి ఉద్యోగ భద్రత కల్పిస్తూ యూజీసీ ఏడో పీఆర్సీ వేతనాలను అమలు చేయాలని డిమాండ్ చేశారు. సుమారు 1,200 మంది కాంట్రాక్ట్ అధ్యాపకుల పోస్టులను మినహాయించి మిగిలిన ఖాళీలను భర్తీ చేయాలని ప్రభుత్వానికి విజ్ఞప్తి చేశారు.

ఈ ధర్నాలో డాక్టర్ పరుషరాం, డాక్టర్ ధర్మతేజ, డాక్టర్ వెంకటేశ్వర్లు, బీసీ విద్యార్థి సంఘం రాష్ట్ర కన్వీనర్ పర్లగోర్ల మోడీరాందేవ్ యాదవ్, సి. రాజేందర్, లింగం యాదవ్ తదితరులు పాల్గొన్నారు.