కలెక్టరేట్‌లో ఘనంగా బతుకమ్మ సంబరాలు.. పాల్గొన్న కలెక్టర్ దీపక్ తివారి
వికారాబాద్ జిల్లా ప్రతినిధి, మేజర్ న్యూస్ : వికారాబాద్ జిల్లా సమీకృత జిల్లా కార్యాలయాల సముదాయం (కలెక్టరేట్) ఆవరణలో గురువారం బతుకమ్మ సంబరాలను ఘనంగా నిర్వహించారు. జిల్లా కలెక్టర్ దీపక్ తివారి గౌరీమాతకు పూజలు నిర్వహించి, మహిళా ఉద్యోగులు, మహిళా సంఘాల సభ్యులు, వారి కుటుంబ సభ్యులతో కలిసి బతుకమ్మ వేడుకల్లో ఉత్సాహంగా పాల్గొన్నారు. డీఆర్‌డీఏ, ఉద్యానవన శాఖ, డీపీఆర్ఓ శాఖల ఆధ్వర్యంలో ఈ వేడుకలు వైభవంగా జరిగాయి.ఈ సందర్భంగా కలెక్టర్ దీపక్ తివారి మాట్లాడుతూ.. బతుకమ్మ పండుగ తెలంగాణ సంస్కృతి, సంప్రదాయాలకు ప్రతీకగా నిలుస్తుందని అన్నారు. మన సంస్కృతి, సంప్రదాయాలను భావితరాలకు అందించాల్సిన బాధ్యత ప్రతి ఒక్కరిపై ఉందని పేర్కొన్నారు. బతుకమ్మ నవరాత్రి ఉత్సవాలతో పాటు దసరా పండుగ విశిష్టతను కూడా పిల్లలకు వివరించి, మన ఆచార వ్యవహారాలను వారికి నేర్పించాలని సూచించారు.ప్రభుత్వ విధులు నిర్వహించడంతో పాటు ఇలాంటి సాంస్కృతిక కార్యక్రమాల్లో పాల్గొనడం ఆనందదాయకమని కలెక్టర్ అన్నారు. ఇటువంటి వేడుకలు ఉద్యోగుల మధ్య స్నేహభావాన్ని, ఐక్యతను పెంపొందిస్తాయని తెలిపారు. తెలంగాణ సంస్కృతి, సంప్రదాయాలను కాపాడుతూ వాటి గొప్పతనాన్ని రాబోయే తరాలకు తెలియజేయాలని పిలుపునిచ్చారు.వేడుకల్లో భాగంగా అందంగా అలంకరించిన బతుకమ్మలను ఎంపిక చేసి, ఉత్తమ బతుకమ్మల నిర్వాహకులకు బహుమతులు అందజేశారు. మహిళా ఉద్యోగులు, మహిళా సంఘాల సభ్యులు సంప్రదాయ దుస్తుల్లో పాల్గొని బతుకమ్మ పాటలతో సందడి చేశారు.ఈ కార్యక్రమంలో జిల్లా అదనపు కలెక్టర్ వెంకటాచారి, ట్రైనీ కలెక్టర్ సచిన్ బస్వరాజ్ గుటుర్, డీఆర్‌డీఏ అధికారులు శ్రీనివాస్, సత్తార్, డీపీఓ జయసుధ, డీపీఆర్ఓ చెన్నమ్మ, సుధాకర్ లాల్, నర్సింహులు, ఏఓ ఫర్వీహీన్ బేగం, కలెక్టరేట్‌లోని వివిధ శాఖల అధికారులు, ఉద్యోగులు పాల్గొన్నారు.
