గీతంలో ఘనంగా ప్రపంచ కూచిపూడి దినోత్సవం -"నాట్యోత్సవ్‌–2026"లో విద్యార్థుల నృత్య ప్రదర్శనలు
గీతం డీమ్డ్‌ విశ్వవిద్యాలయం హైదరాబాద్‌ క్యాంపస్‌లో ప్రపంచ కూచిపూడి దినోత్సవాన్ని పురస్కరించుకుని గురువారం ‘నాట్యోత్సవ్‌–2026’ కార్యక్రమాన్ని ఘనంగా నిర్వహించారు. సంస్కృతి విద్యార్థి విభాగం ఆధ్వర్యంలో జరిగిన ఈ వేడుకలో ప్రముఖ కూచిపూడి గురువు, పద్మభూషణ్‌ డాక్టర్‌ వెంపటి చిన సత్యం కళా వారసత్వానికి నివాళులర్పించారు.ప్రార్థనా గీతంతో ప్రారంభమైన కార్యక్రమం మంగళంతో ముగిసింది. తొమ్మిది మంది విద్యార్థులు బ్రహ్మాంజలి, జతీస్వరం,మురుగ శబ్దం, భామాకలాపం,తరంగం వంటి సంప్రదాయ కూచిపూడి నృత్య ప్రదర్శనలతో ఆకట్టుకున్నారు. అభిగ్న మురుగ శబ్దంలో భావ వ్యక్తీకరణతో మెప్పించగా, భామాకలాపంలో సత్యభామ పాత్రలో హర్ష ప్రదర్శించిన అభినయం ప్రేక్షకుల ప్రశంసలు అందుకుంది.ముఖ్య అతిథిగా పాల్గొన్న నాట్య నివేదన వ్యవస్థాపకుడు గురువు చిరంజయ్‌ పొద్దార్‌ మాట్లాడుతూ..కూచిపూడి నృత్యంలో నైపుణ్యం సాధించాలంటే నిరంతర సాధన, క్రమశిక్షణ, అంకితభావం అవసరమన్నారు. డాక్టర్‌ వెంపటి చిన సత్యం కూచిపూడి కళారూపానికి చేసిన సేవలను కొనియాడారు. సంప్రదాయ కళలను సంరక్షిస్తూ భావితరాలకు అందించాలని సూచించారు.కార్యక్రమంలో విదుషి అంజు అరవింద్‌, విద్వాన్‌ ఆనందు మురళి, అధ్యాపకులు, విద్యార్థులు పాల్గొన్నారు.ఐఐటీ హైదరాబాద్‌ను సందర్శించిన గీతం విద్యార్థులు అధునాతన పరిశోధనలు, సాంకేతికతపై ప్రత్యక్ష అవగాహన అధునాతన పరిశోధనలు, ఆధునిక సాంకేతిక పరిజ్ఞానంపై అవగాహన పెంపొందించుకునేందుకు గీతం డీమ్డ్‌ విశ్వవిద్యాలయం హైదరాబాద్‌ క్యాంపస్‌కు చెందిన 33 మంది విద్యార్థులు, నలుగురు అధ్యాపకులు గురువారం ఇండియన్‌ ఇన్‌స్టిట్యూట్‌ ఆఫ్‌ టెక్నాలజీ హైదరాబాద్‌ (ఐఐటీహెచ్‌)ను సందర్శించారు. గీతం మహిళా సాధికారత విభాగం ఆధ్వర్యంలో నిర్వహించిన ఈ పర్యటనలో మెకానికల్‌, ఏరోస్పేస్‌ ఇంజనీరింగ్‌ విభాగాల పరిశోధనలను పరిశీలించారు.ఈ సందర్భంగా రోబోటిక్స్‌, సాఫ్ట్‌ మ్యాటర్‌,మైక్రోస్విమ్మర్స్‌, ఇన్నోవేషన్‌ హబ్‌, కాంక్రీట్‌, విండ్‌ టన్నెల్‌ ప్రయోగశాలలను సందర్శించారు. స్వయంచాలక రోబోట్లు, డ్రోన్లు, నీటి అడుగున తనిఖీ వ్యవస్థలు, త్రీడీ ప్రింటింగ్‌, అధునాతన కాంక్రీట్‌ సాంకేతికతలు, విండ్‌ టన్నెల్‌ పరీక్షల గురించి తెలుసుకున్నారు.విద్యార్థుల్లో సైన్స్‌, టెక్నాలజీ, ఇంజనీరింగ్‌, గణిత శాస్త్రాలపై ఆసక్తిని పెంపొందించడం, పరిశోధనల వైపు ప్రోత్సహించడం ఈ పర్యటన ప్రధాన ఉద్దేశమని నిర్వాహకులు తెలిపారు. తరగతి గదులకే పరిమితం కాకుండా ప్రయోగశాలలను సందర్శించడం ద్వారా పరిశోధనల ఆచరణాత్మక ఉపయోగాలపై విద్యార్థులు ప్రత్యక్ష అవగాహన పొందారు. ఈ కార్యక్రమంలో అధ్యాపకులు డాక్టర్‌ కె.మల్లేశ్వరి,టి.రాజ్‌ ప్రియాంక,డాక్టర్‌ జ్యోతి రశ్మి నాయక్‌,డాక్టర్‌ సౌపర్ణి పాల్‌ పాల్గొన్నారు.
