చేనేత కార్మికులకు మెరుగైన ఉపాధి

తెలంగాణ బ్యూరో ప్రతినిధి: రాష్ట్రవ్యాప్తంగా తెలంగాణ చేనేత ఉత్పత్తులకు విస్తృత మార్కెటింగ్ అవకాశాలు కల్పించి, చేనేత కార్మికులకు మెరుగైన ఉపాధి, ఆర్థిక ప్రయోజనాలు అందేలా ప్రభుత్వం కృషి చేస్తుందని రాష్ట్ర రవాణా, బీసీ సంక్షేమ శాఖ మంత్రి పొన్నం ప్రభాకర్ తెలిపారు. నాంపల్లిలోని చేనేత భవన్‌లో తెలంగాణ చేనేత అభివృద్ధి కార్పొరేషన్ నూతన కార్యాలయాన్ని మంత్రి ప్రారంభించారు. ఈ సందర్భంగా కార్పొరేషన్ నూతన చైర్మన్‌కు శుభాకాంక్షలు తెలిపారు.

తెలంగాణ చేనేత వస్త్రాలకు రాష్ట్రంతో పాటు దేశవ్యాప్తంగా గుర్తింపు తీసుకురావాల్సిన అవసరం ఉందని మంత్రి పేర్కొన్నారు. చేనేత రంగాన్ని మరింత అభివృద్ధి చేసి, ఈ వృత్తిపై ఆధారపడిన కార్మికుల జీవితాల్లో ఆర్థిక భరోసా కల్పించేందుకు సమగ్ర చర్యలు తీసుకోవాలని సూచించారు. దేవాలయాలు, అధికారిక కార్యక్రమాలు, ఉపాధ్యాయులు, ప్రముఖుల సన్మానాలు తదితర సందర్భాల్లో సాధారణ సిల్క్ శాలువాలకు బదులుగా చేనేత శాలువాలను వినియోగించాలని మంత్రి పొన్నం ప్రభాకర్ సూచించారు. రాజకీయ నాయకులు పరస్పరం గౌరవించుకునే కార్యక్రమాల్లోనూ చేనేత శాలువాలకు ప్రాధాన్యత ఇవ్వాలని అన్నారు. చేనేత వస్త్రాల వినియోగాన్ని పెంచేలా అన్ని ప్రభుత్వ శాఖలకు తగిన సూచనలు, మార్గదర్శకాలు జారీ చేయాలని అధికారులకు సూచించారు. చేనేత రంగంలో ముడిసరుకు సమకూర్చడం నుంచి వస్త్రాల తయారీ, ప్రాసెసింగ్, మార్కెటింగ్ వరకు ప్రతి దశలోనూ సంబంధిత వర్గాలకు ప్రయోజనం కలిగేలా చర్యలు చేపట్టాలని మంత్రి పేర్కొన్నారు. చేనేత కార్మికులు తయారు చేసిన ఉత్పత్తులకు సరైన మార్కెట్ కల్పించి, వారి శ్రమకు తగిన ప్రతిఫలం అందేలా చూడాలన్నారు. చేనేత రంగం అభివృద్ధి చెందితే కార్మికులకు ఉపాధి అవకాశాలు పెరగడంతో పాటు ఆర్థిక భద్రత, సామాజిక గౌరవం లభిస్తాయని చెప్పారు. నూతన చైర్మన్ విద్యార్థి దశ నుంచి రాజకీయ జీవితంలో కష్టపడి పనిచేసిన స్ఫూర్తితో చేనేత రంగ అభివృద్ధికి మరింత అంకితభావంతో కృషి చేయాలని మంత్రి పొన్నం ప్రభాకర్ ఆకాంక్షించారు.