భూముల రీసర్వే వేగవంతం చేయాలి

సూర్య రాజన్న సిరిసిల్ల జిల్లా ప్రతినిధి రాజన్న సిరిసిల్ల జిల్లాలో భూముల రీసర్వే ప్రక్రియను మరింత వేగవంతం చేయాలని కలెక్టర్ గరిమ అగ్రవాల్ అధికారులను ఆదేశించారు. సమీకృత జిల్లా కార్యాలయాల సముదాయం (ఐడీఓసీ)లో మంగళవారం సర్వే, ల్యాండ్ రికార్డ్స్ అధికారులతో కలిసి ఆమె సమీక్ష నిర్వహించారు. ఈ సందర్భంగా జిల్లాలో ఇప్పటివరకు జరిగిన రీసర్వే పనుల పురోగతిపై ఆరా తీశారు.

​- క్షేత్రస్థాయిలో సంయుక్త సర్వే చేయాలి

ఈ సందర్భంగా కలెక్టర్ మాట్లాడుతూ, గ్రామాల సరిహద్దుల నిర్ధారణ కోసం సర్వే, ల్యాండ్ రికార్డ్స్, రెవెన్యూ, అటవీ శాఖల అధికారులు సమన్వయంతో క్షేత్రస్థాయిలో సంయుక్తంగా సర్వే చేపట్టాలని స్పష్టం చేశారు. భూములకు సంబంధించిన వివరాలను ఎలాంటి పొరపాట్లు లేకుండా పక్కాగా సేకరించి కంప్యూటరీకరించాలని సూచించారు. రీసర్వే పనులు జరుగుతున్న గ్రామాల్లో జిల్లా స్థాయి అధికారితో పాటు డీఐలు స్వయంగా పర్యటించి పరిశీలన జరపాలన్నారు.పనుల్లో ఎలాంటి జాప్యం జరగకుండా ఉండేందుకు లైసెన్స్‌డ్ సర్వేయర్ల సంఖ్యను పెంచాలని ఆదేశించారు. రికార్డుల నమోదులో పారదర్శకత పాటించాలని, రైతులకు ఎలాంటి ఇబ్బందులు తలెత్తకుండా పకడ్బందీ చర్యలు తీసుకోవాలని స్పష్టం చేశారు.