భారీ వర్షానికి జలమయమైన కనగర్తి పాఠశాల
భారీ వర్షానికి జలమయమైన కనగర్తి పాఠశాల
-ఆవరణలో చెరువును తలపిస్తున్న వర్షపు నీరు..
విద్యార్థులకు తప్పని తిప్పలు
రాజన్న సిరిసిల్ల /సూర్య కోనరావుపేట:
బుధవారం రాత్రి కురిసిన భారీ వర్షానికి కోనరావుపేట మండలం కనగర్తి మండల పరిషత్ ప్రాథమిక పాఠశాల ఆవరణ జలమయమైంది. పాఠశాల ప్రాంగణంలో పెద్దఎత్తున వర్షపు నీరు నిలిచిపోవడంతో చెరువును తలపించింది. దీంతో గురువారం ఉదయం పాఠశాలకు వచ్చిన విద్యార్థులు, ఉపాధ్యాయులు తరగతి గదుల్లోకి వెళ్లేందుకు తీవ్ర ఇబ్బందులు ఎదుర్కొన్నారు.
పాఠశాల ఆవరణలో వర్షపు నీరు నిలిచిపోవడంతో విద్యార్థుల భద్రతపై తల్లిదండ్రులు ఆందోళన వ్యక్తం చేస్తున్నారు. నీటిలో నడుచుకుంటూ తరగతి గదులకు వెళ్లాల్సిన పరిస్థితి ఏర్పడిందని గ్రామస్తులు పేర్కొన్నారు. వర్షం పడిన ప్రతిసారీ ఇదే సమస్య పునరావృతమవుతోందని, నీరు బయటకు వెళ్లేలా సరైన డ్రైనేజీ సదుపాయం కల్పించాలని కోరుతున్నారు.
అధికారులు స్పందించి పాఠశాల ఆవరణను పరిశీలించి, వర్షపు నీరు నిల్వ ఉండకుండా శాశ్వత పరిష్కారం చూపాలని విద్యార్థుల తల్లిదండ్రులు, గ్రామస్తులు విజ్ఞప్తి చేశారు.
