అమెరికా సెనెట్లో యుద్ధ అధికారాల తీర్మానం
ట్రంప్కు షాకిస్తూ రిపబ్లికన్ల నిర్ణయం
సూర్య అంతర్జాతీయ డెస్క్: అమెరికా ప్రతినిధుల సభ మరియు సెనెట్లో విదేశీ సైనిక చర్యలకు సంబంధించి కీలక పరిణామం చోటుచేసుకుంది. ఇరాన్పై సైనిక చర్యలు చేపట్టే విషయంలో అధ్యక్షుడి అధికారాలను కట్టడి చేసేందుకు ఉద్దేశించిన యుద్ద అధికారాల తీర్మానంపై సెనెట్లో ఓటింగ్ నిర్వహించేందుకు డెమొక్రాట్లు సన్నాహాలు పూర్తి చేశారు. రాబోయే ఎన్నికల నేపథ్యంలో అధ్యక్షుడు డోనాల్డ్ ట్రంప్ తీసుకుంటున్న ఏకపక్ష నిర్ణయాలకు అడ్డుకట్ట వేయడమే లక్ష్యంగా ప్రతిపక్ష డెమొక్రాట్లు ఈ తీర్మానాన్ని ప్రతిపాదించారు. అయితే ఈ అంశంలో అధికార రిపబ్లికన్ పార్టీకి చెందిన కొందరు ప్రజాప్రతినిధులు కూడా సొంత పార్టీ అధ్యక్షుడు ట్రంప్ వైఖరిని విబేధిస్తూ డెమొక్రాట్లకు మద్దతుగా నిలవడం అమెరికా రాజకీయ వర్గాల్లో పెద్ద ఎత్తున కలకలం రేపుతోంది.
కాంగ్రెస్ ముందస్తు అనుమతి లేకుండా ఇరాన్పై ఎటువంటి కొత్త యుద్ధ చర్యలు లేదా విస్తృత ఆపరేషన్లు ప్రారంభించడానికి వీల్లేదని ఈ వార్ పవర్స్ రెసల్యూషన్ స్పష్టం చేస్తోంది. రాజ్యాంగం ప్రకారం సైనిక బలగాల వినియోగానికి సంబంధించిన నిర్ణయాధికారం కేవలం కాంగ్రెస్కు మాత్రమే ఉందని, అధ్యక్షుడు తన పరిధిని దాటి వ్యవహరించడానికి వీల్లేదని సభ్యులు అభిప్రాయపడుతున్నారు. అధ్యక్షుడు ట్రంప్ తీసుకుంటున్న ఆకస్మిక దౌత్యపరమైన, సైనిక నిర్ణయాలు పశ్చిమాసియాలో ఉద్రిక్తతలను మరింత పెంచుతాయని కొందరు సీనియర్ రిపబ్లికన్ నాయకులు బహిరంగంగానే ఆందోళన వ్యక్తం చేస్తున్నారు. దీంతో సెనెట్లో బలనిరూపణ సందర్భంగా ఓటింగ్ అత్యంత ఉత్కంఠభరితంగా మారే అవకాశం కనిపపిస్తోంది.
రాబోయే ప్రతినిధుల సభ, సెనెట్ ఎన్నికల ప్రచారంలో ఈ యుద్ధ అధికారాల అంశం ప్రధాన అస్త్రంగా మారింది. సైనిక దళాల భద్రత, దేశ ఆర్థిక వనరుల వినియోగంపై సమాధానం చెప్పాల్సిన బాధ్యత పరిపాలనా యంత్రాంగానికి ఉందంటూ డెమొక్రాట్లు ప్రజల్లోకి తీసుకెళ్తున్నారు. మరోవైపు తమ వైఖరిని సమర్థించుకుంటున్న వైట్ హౌస్, జాతీయ భద్రత దృష్ట్యా అధ్యక్షుడికి తక్షణ నిర్ణయాలు తీసుకునే అధికారం ఉండాలని వాదిస్తోంది. అయినప్పటికీ సొంత పార్టీలోనే సొంత నిర్ణయాలపై అసమ్మతి బయటపడటం ట్రంప్ వర్గానికి రాజకీయంగా ఎదురుదెబ్బగానే విశ్లేషకులు భావిస్తున్నారు. సెనెట్లో జరగబోయే ఈ తీర్మానం ఓటింగ్ అమెరికా విదేశాంగ విధానంలో కీలక మలుపుగా మారనుంది.
