సీఈసీ జ్ఞానేష్ కుమార్ తక్షణమే రాజీనామా చేయాలి : రాజ్ థాకరే
సూర్య జాతీయ డెస్క్: కేంద్ర ఎన్నికల సంఘం (ఈసీఐ) రాజ్యాంగబద్ధమైన స్వయంప్రతిపత్తిని పూర్తిగా కోల్పోయిందని మహారాష్ట్ర నవనిర్మాణ సేన (ఎమ్మెన్నెస్) అధ్యక్షుడు రాజ్ థాకరే తీవ్రస్థాయిలో ధ్వజమెత్తారు. ఓటర్ల జాబితాల సవరణ తదితర కీలక నిర్ణయాల్లో ప్రధాన ఎన్నికల కమిషనర్ (సీఈసీ) జ్ఞానేష్ కుమార్తో తోటి ఎన్నికల కమిషనర్లు సుఖ్బీర్ సింగ్ సంధు, వివేక్ జోషి ఏకీభవించకుండా 14 సందర్భాల్లో లిఖితపూర్వక అసమ్మతిని వ్యక్తం చేసినట్లు వెల్లడైన పరిశోధనాత్మక కథనాన్ని ఆయన ప్రస్తావించారు. సీఈసీ స్వతంత్రంగా వ్యవహరించడం లేదని, కేంద్రంలోని అధికార బీజేపీ ప్రయోజనాలకు అనుగుణంగా ఏకపక్ష నిర్ణయాలు తీసుకుంటున్నారని ఆరోపిస్తూ, సీఈసీ పదవికి జ్ఞానేష్ కుమార్ తక్షణమే రాజీనామా చేయాలని రాజ్ థాకరే డిమాండ్ చేశారు.
ఎన్నికల సంఘం నిర్ణయాల వెనుక ఉండి నడిపిస్తున్న అసలైన 'మాస్టర్మైండ్స్' ఎవరన్న దానిపై ఉన్నత స్థాయి స్వతంత్ర దర్యాప్తు జరిపించాలని ఎమ్మెన్నెస్ అధినేత డిమాండ్ చేశారు. ముగ్గురు సభ్యులున్న కమిషన్లో ఇద్దరు కమిషనర్లను చీకట్లో ఉంచి పక్కనపెట్టడం ప్రజాస్వామ్యానికే గొడ్డలిపెట్టని ఆయన పేర్కొన్నారు. పశ్చిమ బెంగాల్లో దాఖలైన 16.1 లక్షల అప్పీళ్లు, ఓటర్ లిస్ట్ సాఫ్ట్వేర్ మార్పులు, చట్టబద్ధమైన ఫారాల సవరణ వంటి అంశాల్లో పూర్తి కమిషన్ ఆమోదం లేకుండా ఉత్తర్వులు ఎలా జారీ చేస్తారని ఆయన నిలదీశారు. స్వతంత్ర వ్యవస్థల అండతో అధికారంలోకి వచ్చిన ప్రస్తుత ప్రభుత్వం కూడా నైతిక బాధ్యత వహించి రాజీనామా చేయాలని రాజ్ థాకరే తేల్చిచెప్పారు.
ఎన్నికల వ్యవస్థల్లో విశ్వసనీయత పూర్తిగా దెబ్బతిన్నందున దేశంలో ఎలక్ట్రానిక్ ఓటింగ్ యంత్రాల (ఈవీఎం) విధానాన్ని పూర్తిగా రద్దు చేసి, బ్యాలెట్ పేపర్ల ద్వారానే ఎన్నికలు నిర్వహించాలని ఆయన డిమాండ్ చేశారు. తన ఎన్నికల సభలకు ప్రజలు పోటెత్తినా ఫలితాల్లో అవి సీట్లుగా ఎందుకు మారడం లేదన్న ప్రశ్నకు ఈసీఐ అంతర్గత అసమ్మతి పరిణామాలే సరైన సమాధానం ఇస్తున్నాయని, ఓట్లను ఎవరు ఎలా కొల్లగొడుతున్నారో ఇప్పుడు స్పష్టమైందని విమర్శించారు. దేశవ్యాప్తంగా ఉన్న ప్రతిపక్ష పార్టీలన్నీ ఏకతాటిపైకి వచ్చి ఎన్నికల సంఘం స్వతంత్రత పునరుద్ధరణ మరియు బ్యాలెట్ పేపర్ల పునరుద్ధరణ కోసం దేశవ్యాప్త ఉద్యమం చేపట్టాలని రాజ్ థాకరే పిలుపునిచ్చారు.
