ఐఐఈఎస్టీ షిబ్పూర్తో టీసీఎస్ ఒప్పందం
క్యాంపస్లో అధునాతన ఆర్టిఫిషియల్ ఇంటెలిజెన్స్ సెంటర్ ఆఫ్ ఎక్సలెన్స్
సూర్య జాతీయ డెస్క్: దేశంలోని ప్రముఖ విద్యాసంస్థ ఇండియన్ ఇన్స్టిట్యూట్ ఆఫ్ ఇంజనీరింగ్ సైన్స్ అండ్ టెక్నాలజీ (ఐఐఈఎస్టీ) షిబ్పూర్ మరియు ఐటీ దిగ్గజం టాటా కన్సల్టెన్సీ సర్వీసెస్ (టీసీఎస్) మధ్య కీలక ఒప్పందం కుదిరింది. క్యాంపస్ ప్రాంగణంలో ఆర్టిఫిషియల్ ఇంటెలిజెన్స్ (ఏఐ) రంగంలో అత్యున్నత పరిశోధనల కోసం అధునాతన సెంటర్ ఆఫ్ ఎక్సలెన్స్ (CoE) ఏర్పాటు చేసేందుకు ఇరు సంస్థలు అవగాహన ఒప్పందం (MoU) పై సంతకాలు చేశాయి. ఐఐఈఎస్టీ షిబ్పూర్ ఎలక్ట్రికల్ ఇంజనీరింగ్ విభాగంలోని హై-పెర్ఫార్మెన్స్ కంప్యూటింగ్ ల్యాబ్ను ఈ నూతన సెంటర్ ఆఫ్ ఎక్సలెన్స్ వేదికగా నిర్ణయించారు. ఐఐఈఎస్టీ డైరెక్టర్ ప్రొఫెసర్ వి.ఎం.ఎస్.ఆర్. మూర్తి సమక్షంలో టీసీఎస్ సీనియర్ అధికారులతో కూడిన ప్రతినిధి బృందం ఈ ఒప్పంద పత్రాలపై సంతకాలు పూర్తి చేసింది.
కేంద్ర ప్రభుత్వం ప్రతిష్టాత్మకంగా చేపడుతున్న డిజిటల్ ఇండియా మరియు వికసిత్ భారత్ 2047 లక్ష్యాలకు అనుగుణంగా ఈ భాగస్వామ్యాన్ని రూపొందించినట్లు విద్యాసంస్థ ప్రతినిధులు వెల్లడించారు. అకాడమిక్ విజ్ఞానాన్ని పారిశ్రామిక వినియోగానికి అనుసంధానించడం ద్వారా సాంకేతిక రంగానికి అవసరమైన భవిష్యత్ మానవ వనరులను తీర్చిదిద్దడం ఈ కేంద్రం ప్రధాన ఉద్దేశం. ఐఐఈఎస్టీ బోధనా పటిష్టతకు, టీసీఎస్ సంస్థకు ఉన్న అంతర్జాతీయ పారిశ్రామిక అనుభవం తోడవ్వడం ద్వారా జాతీయ స్థాయిలో ఏఐ వ్యవస్థ మరింత బలోపేతం కానుంది. పారిశ్రామిక మరియు సామాజిక సవాళ్లకు పరిష్కారాలు కనుగొనేందుకు ఈ కేంద్రం దేశవ్యాప్తంగా ఉన్న ప్రతిభావంతులైన విద్యార్థులు, పరిశోధకులకు వేదికగా నిలుస్తుందని ఇరు వర్గాలు స్పష్టం చేశాయి.
ఈ ఒప్పందం ద్వారా విద్యా కోర్సుల పాఠ్యాంశాలను పరిశ్రమల ప్రస్తుత ప్రమాణాలకు అనుగుణంగా టీసీఎస్ నిపుణులు ఆధునీకరిస్తారు. దీనితో పాటు ఏఐ ఆధారిత నూతన స్టార్టప్లు, విద్యార్థుల వ్యాపార ఆలోచనలకు పారిశ్రామిక రంగానికి చెందిన అనుభవజ్ఞుల నుంచి నేరుగా మార్గదర్శకత్వం లభిస్తుంది. నైపుణ్యాభివృద్ధి, ధృవీకరణ పత్రాలు, ప్రాజెక్టులు మరియు ఇంటర్న్షిప్ల ద్వారా విద్యార్థులకు ఆచరణాత్మక శిక్షణ అందించనున్నారు. ముఖ్యంగా నాచురల్ లాంగ్వేజ్ ప్రాసెసింగ్ (NLP), కంప్యూటర్ విజన్, ఇమేజ్ ప్రాసెసింగ్ మరియు అడ్వాన్స్డ్ డేటా అనలిటిక్స్ వంటి కీలక విభాగాల్లో ఉమ్మడి పరిశోధనలను ముమ్మరం చేయనున్నారు. తూర్పు భారతదేశంలో డిజిటల్ ఆవిష్కరణలకు ఈ భాగస్వామ్యం మైలురాయిగా నిలుస్తుందని ఐఐఈఎస్టీ డైరెక్టర్ ఆశాభావం వ్యక్తం చేశారు.
