ఆయుష్మాన్ భారత్ రాకముందు చికిత్స కోసం ఇళ్లు, స్థలాలు అమ్ముకునేవారు: కేంద్ర మంత్రి జేపీ నడ్డా

సూర్య జాతీయ డెస్క్: ఆయుష్మాన్ భారత్ ప్రధానమంత్రి జన్ ఆరోగ్య యోజన (పీఎంజేఏవై) దేశీయ ఆరోగ్య సంరక్షణ రంగంలో విప్లవాత్మక మార్పులు తీసుకొచ్చిందని కేంద్ర ఆరోగ్య శాఖ మంత్రి జేపీ నడ్డా స్పష్టం చేశారు. న్యూఢిల్లీలోని విజ్ఞాన్ భవన్‌లో నిర్వహించిన ఆరోగ్య మంథన్ కార్యక్రమంలో ఆయన ప్రసంగిస్తూ, ఈ పథకం ప్రారంభం కాకముందు క్యాన్సర్, గుండెజబ్బులు వంటి ప్రాణాంతక వ్యాధులకు వైద్యం చేయించుకునేందుకు పేద, మధ్యతరగతి కుటుంబాలు తమ ఇళ్లు, భూములు అమ్ముకోవాల్సిన దుస్థితి ఉండేదని గుర్తుచేశారు. నరేంద్ర మోదీ ప్రభుత్వం ప్రతిష్టాత్మకంగా అమలు చేస్తున్న ఉచిత ఆరోగ్య బీమా పథకం వల్ల నేడు కోట్ల మంది పేదలకు ఆర్థిక భరోసాతో కూడిన నాణ్యమైన వైద్య సేవలు అందుతున్నాయని వివరించారు.

గతంలో ఎమ్మెల్యేగా ఉన్న రోజులను గుర్తుచేసుకున్న కేంద్ర మంత్రి, అప్పట్లో బైపాస్ సర్జరీ కోసం లక్ష రూపాయల సహాయం కావాలంటూ ముఖ్యమంత్రి వద్దకు వెళ్తే సహాయ నిధికి వచ్చే విజ్ఞప్తులు భారీగా ఉండటంతో ఎంతమందికి సహాయం చేయగలమనే నిస్సహాయత ఉండేదని పేర్కొన్నారు. కానీ నేడు ఆయుష్మాన్ భారత్ పథకం ప్రపంచంలోనే అతిపెద్ద ఆరోగ్య భరోసా కార్యక్రమంగా అవతరించిందని తెలిపారు. పథకం ప్రారంభమైనప్పటి నుంచి ఇప్పటివరకు పదమూడు కోట్లకు పైగా ఆసుపత్రి అడ్మిషన్లను కల్పించి, రెండు లక్షల కోట్ల రూపాయలకు పైగా విలువైన ఉచిత చికిత్సలను విజయవంతంగా అందించినట్లు గణాంకాలతో సహా వెల్లడించారు.

దేశవ్యాప్తంగా అరవై కోట్లకు పైగా లబ్ధిదారులకు ఈ పథకం రక్షణ కవచంలా నిలిచిందని, ఇటీవల కేంద్ర ప్రభుత్వం తీసుకున్న నిర్ణయంతో ఆర్థిక స్థితితో సంబంధం లేకుండా డెబ్బై ఏళ్లు దాటిన వయోవృద్ధులందరికీ ఈ పథకాన్ని వర్తింపజేశామని నడ్డా వివరించారు. ఆయుష్మాన్ భారత్ డిజిటల్ మిషన్ ద్వారా దేశ ఆరోగ్య వ్యవస్థను మరింత సాంకేతికతతో అనుసంధానిస్తున్నామని, సామాన్యుడిపై వైద్య ఖర్చుల భారం తగ్గించడమే కాకుండా దేశంలోని ప్రతి పౌరుడికి అత్యుత్తమ వైద్య సదుపాయాలు చేరువ చేయడమే తమ ప్రభుత్వ ప్రధాన ప్రాధాన్యతని స్పష్టం చేశారు.