మోమిన్పేట్ మారుమూల గ్రామాల రోడ్లకు మహర్దశ
రూ.5.70 కోట్లకు పైగా నిధులు మంజూరు.. త్వరలో పనులు ప్రారంభం
మండల కాంగ్రెస్ అధ్యక్షుడు మన్నె శంకర్ యాదవ్
మోమిన్పేట్,మేజర్ న్యూస్ (సెప్టెంబర్ 24):
మోమిన్పేట్ మండలంలోని మారుమూల గ్రామాల రహదారులకు ప్రభుత్వం భారీగా నిధులు మంజూరు చేసిందని మండల కాంగ్రెస్ పార్టీ అధ్యక్షుడు మన్నె శంకర్ యాదవ్ తెలిపారు. గ్రామాలకు మెరుగైన రవాణా సౌకర్యం కల్పించేందుకు పలు బీటీ రోడ్ల నిర్మాణానికి 2025-26 ఆర్థిక సంవత్సరానికి నిధులు మంజూరైనట్లు పేర్కొన్నారు.
గురువారం మోమిన్పేట్ మండల కేంద్రంలో ఏర్పాటు చేసిన విలేకరుల సమావేశంలో ఆయన మాట్లాడుతూ.. చక్రంపల్లి, బాల్రెడ్డిగూడ, సయ్యద్ అలీపూర్, పల్లెగుట్ట తండా, బూరుగుపల్లి, వెల్చాల్ నుంచి మల్లారెడ్డిగూడ వరకు పలు రహదారుల నిర్మాణానికి నిధులు మంజూరైనట్లు తెలిపారు.
నిధుల వివరాలు ఇలా..
- చక్రంపల్లి పీడబ్ల్యూడీ రోడ్డు నుంచి గ్రామం వరకు కిలోమీటర్ మేర బీటీ రోడ్డు నిర్మాణానికి రూ.50 లక్షలు.
- బాల్రెడ్డిగూడకు మెయిన్ రోడ్డు నుంచి గ్రామం వరకు 2 కిలోమీటర్ల రహదారి నిర్మాణానికి రూ.1.60 కోట్లు.
- పల్లెగుట్ట తండా నుంచి సయ్యద్ అలీపూర్ గ్రామం వరకు రహదారి నిర్మాణానికి రూ.1.20 కోట్లు.
- బూరుగుపల్లి బస్టాండ్ నుంచి గ్రామం వరకు 60 మీటర్ల రహదారి నిర్మాణానికి రూ.40 లక్షలు.
- వెల్చాల్ నుంచి మల్లారెడ్డిగూడ గ్రామం వరకు 2.80 కిలోమీటర్ల రహదారి నిర్మాణానికి రూ.3 కోట్లు మంజూరైనట్లు తెలిపారు.
ఈ పనులకు సంబంధించి టెండర్ ప్రక్రియ పూర్తయిందని, త్వరలోనే రోడ్ల నిర్మాణ పనులు ప్రారంభం కానున్నాయని మన్నె శంకర్ యాదవ్ తెలిపారు. మారుమూల గ్రామాలకు మెరుగైన రవాణా సౌకర్యం కల్పించేందుకు ప్రభుత్వం తీసుకుంటున్న చర్యలతో ప్రజలకు ఎంతో ప్రయోజనం కలుగుతుందని ఆయన అన్నారు. రహదారుల నిర్మాణం పూర్తయితే ఆయా గ్రామాల ప్రజలకు ప్రయాణ ఇబ్బందులు తొలగడంతో పాటు వ్యవసాయ ఉత్పత్తులను మార్కెట్లకు తరలించేందుకు సౌకర్యం కలుగుతుందని పేర్కొన్నారు.రిపోర్టర్ మాణిక్య చారి
