అనంతగిరి ఘాట్‌ బస్సు ప్రమాదంపై స్పీకర్ దిగ్భ్రాంతి

నలుగురు మృతి చెందడం బాధాకరం.. క్షతగాత్రులకు మెరుగైన వైద్యం అందించాలి

విదేశీ పర్యటనలో ఉండి వెంటనే స్పందించిన గడ్డం ప్రసాద్ కుమార్

వికారాబాద్ జిల్లా ప్రతినిధి, మేజర్ న్యూస్( అక్టోబర్ 3): 

వికారాబాద్ జిల్లా అనంతగిరి ఘాట్‌ డౌన్‌లో జరిగిన ప్రైవేటు బస్సు ప్రమాదంపై శాసనసభ స్పీకర్, వికారాబాద్ ఎమ్మెల్యే గడ్డం ప్రసాద్ కుమార్ తీవ్ర దిగ్భ్రాంతి వ్యక్తం చేశారు. ఈ ప్రమాదంలో నలుగురు  మృతి చెందడం చాలా బాధాకరమని విచారం వ్యక్తం చేశారు. మృతుల కుటుంబాలకు ప్రగాఢ సానుభూతి తెలిపారు.ప్రస్తుతం విదేశీ పర్యటనలో ఉన్న స్పీకర్ ప్రసాద్ కుమార్‌కు బస్సు ప్రమాదం విషయం తెలియగానే వెంటనే స్పందించారు. సంబంధిత అధికారులను అప్రమత్తం చేసి ప్రమాద స్థలంలో సహాయక చర్యలను ముమ్మరం చేయాలని ఆదేశించారు. క్షతగాత్రులను ఆసుపత్రికి తరలించి మెరుగైన వైద్య చికిత్స అందించాలని వైద్యులకు సూచించారు.ప్రమాదంలో గాయపడిన వారికి అవసరమైన వైద్య సేవలు అందేలా చూడాలని స్పీకర్ అధికారులను ఆదేశించారు. బాధితులను అన్ని విధాలుగా ఆదుకుంటామని ఈ సందర్భంగా గడ్డం ప్రసాద్ కుమార్ భరోసా ఇచ్చారు.

కుమ్మరి రాఘవేందర్, వికారాబాద్ జిల్లా ప్రతినిధి.