ఆటో నుంచి జారిపడిన వ్యక్తిపైకి దూసుకెళ్లిన కారు

దోమ మండలంలో విషాద ఘటన.. ఆసుపత్రికి తరలించేలోపే మృతి

దోమ, మేజర్ న్యూస్ (సెప్టెంబర్ 29):దోమ మండల పరిధిలో జరిగిన రోడ్డు ప్రమాదంలో ఓ వ్యక్తి దుర్మరణం చెందాడు. ఆటోలో ప్రయాణిస్తున్న వ్యక్తి ప్రమాదవశాత్తు కిందపడగా, అదే సమయంలో వెనుక నుంచి వేగంగా వచ్చిన కారు అతడిపై నుంచి దూసుకెళ్లడంతో ఈ విషాద ఘటన చోటుచేసుకుంది.
పోలీసులు తెలిపిన వివరాల ప్రకారం.. సయ్యద్‌పల్లి గ్రామానికి చెందిన దేశమోని యాదయ్య తన అల్లుడు శ్రీనివాస్‌ను కలిసేందుకు చాపలగూడెం వైపు ఆటోలో ప్రయాణిస్తున్నాడు. ప్రయాణిస్తున్న క్రమంలో యాదయ్య ప్రమాదవశాత్తు ఆటో నుంచి జారిపడి రోడ్డుపై పడిపోయాడు. అదే సమయంలో వెనుక నుంచి వచ్చిన కారు అదుపు తప్పి కిందపడిన యాదయ్యపై నుంచి దూసుకెళ్లింది.ఈ ప్రమాదంలో యాదయ్య తీవ్రంగా గాయపడ్డాడు. విషయం గమనించిన స్థానికులు వెంటనే అతడిని చికిత్స నిమిత్తం పరిగి ప్రభుత్వ ఆసుపత్రికి తరలించారు. అయితే వైద్యులు పరీక్షించి అప్పటికే యాదయ్య మృతి చెందినట్లు నిర్ధారించారు.సమాచారం అందుకున్న పోలీసులు సంఘటనా స్థలానికి చేరుకుని ప్రమాదానికి సంబంధించిన వివరాలను సేకరించారు. ఘటనపై కేసు నమోదు చేసి దర్యాప్తు చేపట్టినట్లు దోమ ఎస్సై వసంత్ జాదవ్ తెలిపారు.రిపోర్టర్ చాపల బద్రి.