telanagana
ఆసుపత్రి సేవలను పరిశీలించిన హెల్త్‌కేర్ విద్యార్థులు
కొడంగల్, మేజర్ న్యూస్: ప్రభుత్వ డిగ్రీ కళాశాల బీఎస్సీ హెల్త్‌కేర్ విద్యార్థులు బుధవారం కొడంగల్ ప్రభుత్వ ఆసుపత్రి, క్రిటికల్ కేర్ విభాగాలను సందర్శించారు. పాఠ్య ప్రణాళికలో భాగంగా ఆసుపత్రిలోని ఐపీ, ఓపీ, ఐసీయూ, ఎమర్జెన్సీ, ల్యాబ్, ఎక్స్‌రే, ఈసీజీ, డయాలిసిస్ తదితర విభాగాల పనితీరును పరిశీలించారు. ఈ సందర్భంగా ఆసుపత్రి వైద్యులు, నర్సింగ్, సాంకేతిక సిబ్బంది విద్యార్థులకు ఆయా విభాగాల సేవలు, రోగుల నిర్వహణపై అవగాహన కల్పించారు. కార్యక్రమంలో కళాశాల ప్రిన్సిపాల్ డా. బి. శ్రీనివాస్ రెడ్డి, డా. సాకేత్, వైద్యులు, అధ్యాపకులు, విద్యార్థులు పాల్గొన్నారు.
వ్యక్తిత్వ వికాసంతో లక్ష్యాలను చేరుకోవాలి
ప్రభుత్వ డిగ్రీ కళాశాలలో ఐక్యూఏసీ ఆధ్వర్యంలో బుధవారం విద్యార్థులకు వ్యక్తిత్వ వికాసంపై అవగాహన కార్యక్రమం నిర్వహించారు. ముఖ్య అతిథి డి.ఎస్.ఆర్. రాజేందర్ సింగ్ మాట్లాడుతూ విద్యార్థులు పట్టుదల, క్రమశిక్షణ, స్వీయ నియంత్రణతో ఉన్నత లక్ష్యాలను ఏర్పరచుకుని సాధించే దిశగా కృషి చేయాలని సూచించారు. విద్యతో పాటు నైపుణ్యాలను పెంపొందించుకోవాలని తెలిపారు. అనంతరం ఉత్తమ ఎన్‌ఎస్‌ఎస్‌ వాలంటీర్ వి. సికిందర్‌ను సన్మానించారు. ఈ కార్యక్రమంలో ప్రిన్సిపాల్ డా. బి. శ్రీనివాస్ రెడ్డి, వైస్ ప్రిన్సిపాల్ రఫియా ఖానమ్, ఐక్యూఏసీ కోఆర్డినేటర్ టి. రాంబాబు, అధ్యాపకులు, విద్యార్థులు పాల్గొన్నారు.
