18 క్వింటాళ్ల పీడీఎస్ బియ్యం పట్టివేత

సూర్య మానకొండూరు: మండల పరిధిలోని అన్నారం గ్రామంలో అక్రమంగా సాగుతున్న పీడీఎస్ (రేషన్) బియ్యం రీసైక్లింగ్ వ్యాపార గుట్టును టాస్క్ ఫోర్స్ అధికారులు రట్టు చేశారు. నమ్మదగిన సమాచారం మేరకు మంగళవారం అన్నారం గ్రామంలో ఏసీపీ టాస్క్ ఫోర్స్ సతీష్ కుమార్ ఆధ్వర్యంలో అధికారులు మెరుపు దాడి నిర్వహించారు.టాస్క్ ఫోర్స్ అధికారుల కథనం ప్రకారం.. అన్నారం గ్రామానికి చెందిన వెల్ది వెంకన్న చుట్టుపక్కల గ్రామాల నుండి రేషన్ బియ్యాన్ని అక్రమంగా సేకరించి, వాటిని పాలిష్ చేసి రీసైక్లింగ్ (మళ్లీ కొత్త బియ్యంలా మార్చడం) చేస్తున్నాడనే పక్కా సమాచారంతో అధికారులు రంగంలోకి దిగారు. గ్రామంలో వెంకన్నకు సంబంధించిన మినీ మోడ్రన్ రైస్ మిల్లుపై అధికారులు ఆకస్మిక తనిఖీలు చేపట్టారు. ఈ తనిఖీలలో ఎలాంటి అనుమతులు లేకుండా అక్రమంగా నిల్వ ఉంచిన సుమారు 18 క్వింటాళ్ల పీడీఎస్ (రేషన్) బియ్యాన్ని అధికారులు గుర్తించి, స్వాధీనం చేసుకున్నారు.స్వాధీనం చేసుకున్న 18 క్వింటాళ్ల బియ్యాన్ని, పట్టుబడిన నిందితుడిని తదుపరి చట్టపరమైన విచారణ నిమిత్తం మానకొండూరు పోలీసులకు అప్పగించ్చారు. ఈ మేరకు అక్రమంగా రేషన్ బియ్యాన్ని నిల్వ ఉంచి రీసైక్లింగ్ చేస్తున్న నిందితుడు వెల్ది వెంకన్నపై కేసు నమోదు చేసి దర్యాప్తు చేస్తున్నట్లు మానకొండూరు పోలీసులు తెలిపారు. పేదల బియ్యాన్ని అక్రమంగా బ్లాక్ మార్కెట్ కు తరలిస్తే ఎంతటి వారైనా ఉపేక్షించేది లేదని, కఠిన చర్యలు తీసుకుంటామని ఈ సందర్భంగా అధికారులు హెచ్చరించారు.