ఐపీఎల్ 2027లో లక్నో సూపర్ జెయింట్స్ కెప్టెన్ ఎవరు.. రేసులో ఉన్న ముగ్గురు స్టార్లు వీరే!
సూర్య స్పోర్ట్స్ డెస్క్: ఇండియన్ ప్రీమియర్ లీగ్ 2027 సీజన్ కోసం లక్నో సూపర్ జెయింట్స్ కొత్త కెప్టెన్ వేటలో పడింది. గత సీజన్లలో జట్టుకు నాయకత్వం వహించిన రిషభ్ పంత్ ట్రేడ్ డీల్ ద్వారా ఢిల్లీ క్యాపిటల్స్కు వెళ్లడంతో, లక్నో ఫ్రాంచైజీకి కొత్త సారథిని ఎంపిక చేయాల్సిన పరిస్థితి ఏర్పడింది. ఈ నేపథ్యంలో కెప్టెన్సీ రేసులో మిచెల్ మార్ష్, ఎయిడెన్ మార్క్రమ్, నికోలస్ పూరన్ పేర్లు ప్రముఖంగా వినిపిస్తున్నట్లు క్రికెట్ వర్గాల్లో చర్చ జరుగుతోంది.
రిటెన్షన్ ప్రక్రియ అనంతరం జట్టు నాయకత్వ అంశంపై లక్నో సూపర్ జెయింట్స్ గ్లోబల్ క్రికెట్ డైరెక్టర్ టామ్ మూడీ కీలక వ్యాఖ్యలు చేశారు. విదేశీ ఆటగాళ్లతో పాటు స్వదేశీ ఆటగాళ్ల నుంచి కూడా నాయకత్వ బాధ్యతలను ఆశిస్తున్నట్లు ఆయన స్పష్టం చేశారు. ముఖ్యంగా ఆయుష్ బదోని వంటి యువ ఆటగాడు నాయకత్వ లక్షణాలను అలవర్చుకుంటుండగా, ఇటీవల జట్టులోకి వచ్చిన సామ్ కరన్ కూడా లీడర్షిప్ గ్రూప్లో కీలక పాత్ర పోషించే అవకాశం ఉందని తెలిపారు.
కెప్టెన్సీ రేసులో ఉన్న మిచెల్ మార్ష్, ఎయిడెన్ మార్క్రమ్, నికోలస్ పూరన్లకు అంతర్జాతీయ స్థాయిలోనూ, వివిధ ఫ్రాంచైజీ లీగ్లలోనూ జట్లను నడిపించిన అనుభవం ఉంది. జట్టు కూర్పు, విదేశీ ఆటగాళ్ల కాంబినేషన్ను దృష్టిలో ఉంచుకుని ఫ్రాంచైజీ యాజమాన్యం తుది నిర్ణయం తీసుకోనుంది.
డిసెంబర్లో జరగనున్న ఐపీఎల్ వేలానికి భారీ పర్స్తో సిద్ధమవుతున్న లక్నో సూపర్ జెయింట్స్, జట్టును బలోపేతం చేసుకోవడంతో పాటు కెప్టెన్సీపై త్వరలోనే స్పష్టత ఇచ్చే అవకాశం ఉంది. కొత్త సారథి సారథ్యంలో వచ్చే సీజన్లో లక్నో ఎలాంటి ప్రదర్శన కనబరుస్తుందో చూడాలి.