వారణాసి క్రికెట్ స్టేడియం డమరుకం డిజైన్కు జై షా ఫిదా.. డిసెంబర్ నాటికి మ్యాచ్లకు సిద్ధం!
సూర్య స్పోర్ట్స్ డెస్క్: ఉత్తరప్రదేశ్లోని వారణాసి నగరంలో అత్యంత ప్రతిష్టాత్మకంగా నిర్మిస్తున్న అంతర్జాతీయ క్రికెట్ స్టేడియం నిర్మాణ పనులు తుది దశకు చేరుకున్నాయి. నవంబర్ 18న ఐసీసీ అధ్యక్షుడు జై షా ఈ స్టేడియాన్ని సందర్శించి, నిర్మాణ పురోగతిని బీసీసీఐ ఉన్నతాధికారులతో కలిసి సమీక్షించారు. ప్రధాన మైదానం, పిచ్లు, ఆటగాళ్ల డ్రెస్సింగ్ రూమ్లు, గ్యాలరీలతో పాటు శివుడి డమరుకం ఆకారంలో రూపొందించిన మీడియా సెంటర్ డిజైన్ ఆయనను విశేషంగా ఆకట్టుకుంది.
వారణాసి గంజారి ప్రాంతంలో 30 ఎకరాలకు పైగా విస్తీర్ణంలో సుమారు రూ.450 కోట్ల వ్యయంతో ఈ స్టేడియాన్ని నిర్మిస్తున్నారు. దాదాపు 30 వేల మంది ప్రేక్షకులు కూర్చునే సామర్థ్యంతో సిద్ధమవుతున్న ఈ మైదానంలో, ప్రధాన మైదానంలో తొమ్మిది పిచ్లు, ప్రాక్టీస్ గ్రౌండ్లో ఐదు పిచ్లు ఏర్పాటు చేస్తున్నారు. ఇక్కడ వీలైనన్ని ఎక్కువ అంతర్జాతీయ మ్యాచ్లు నిర్వహించేందుకు కృషి చేస్తామని జై షా భరోసా ఇచ్చారు.
కాశీ సంస్కృతి, శివతత్వ ప్రతీకలు కనిపించేలా ఈ స్టేడియం వాస్తుశిల్పాన్ని రూపొందించారు. డమరుకం ఆకారంలోని మీడియా సెంటర్, త్రిశూలం తరహా ఫ్లడ్లైట్ టవర్లు, చంద్రవంకను పోలిన పైకప్పు, ఘాట్ల మెట్ల తరహాలో గ్యాలరీలు, బిల్వపత్రం ఆకారంలోని బయటి పలకలు ప్రత్యేక ఆకర్షణలుగా నిలవనున్నాయి. వర్షం కురిసిన 20 నుంచి 25 నిమిషాల్లోనే మైదానాన్ని తిరిగి మ్యాచ్కు సిద్ధం చేసే అత్యాధునిక డ్రైనేజీ వ్యవస్థను కూడా ఇక్కడ ఏర్పాటు చేస్తున్నారు.
నవంబర్ 30లోగా మిగిలి ఉన్న పనులన్నింటినీ పూర్తి చేసి, డిసెంబర్ నాటికి స్టేడియాన్ని మ్యాచ్ల నిర్వహణకు సిద్ధం చేయాలని అధికారులకు జై షా గడువు విధించారు. నవంబర్ 19 నుంచి పిచ్ల తయారీ పనులు ప్రారంభమవుతుండగా, డిసెంబర్లో స్టేడియం ప్రారంభోత్సవం జరిగే అవకాశముందని సమాచారం.
Also Read: దేశవ్యాప్త విమాన నిలిపివేతకు దారితీసిన అంతరాయం కారణాల వెల్లడికి అమెరికా సన్నాహాలు