ఆగ్నేయాసియా సైబర్ స్కామ్ కేంద్రాలపై అమెరికా ఆంక్షలు
సూర్య అంతర్జాతీయ డెస్క్: ఆగ్నేయాసియా కేంద్రంగా పనిచేస్తున్న సైబర్ స్కామ్ నెట్వర్క్లు, వాటికి సహకరిస్తున్న సాయుధ బృందాల నేతలపై అమెరికా ఆర్థిక శాఖ కఠిన ఆంక్షలు విధించింది. కంబోడియాలో స్కామ్ కేంద్రాల నిర్వాహకుడిగా వ్యవహరిస్తున్న జావో హుయ్తో పాటు, మయన్మార్లోని డెమోక్రటిక్ కరెన్ బుద్ధిస్ట్ ఆర్మీకి చెందిన సా ష్వే వా, సా ఏ వన్లపై ఆంక్షల విధింపును ఆఫీస్ ఆఫ్ ఫారిన్ అసెట్స్ కంట్రోల్ ప్రకటించింది. ఈ చర్యలలో భాగంగా జావో హుయ్కు సంబంధించిన సంస్థలైన బీ ఫాంగ్ బో లిన్, జెడ్హెచ్జెడ్ ఇన్వెస్ట్మెంట్లపైనా ఆంక్షలు అమల్లోకి వచ్చాయి.
కంబోడియాలో స్వతంత్రంగా ఒక స్కామ్ కేంద్రాన్ని నిర్వహిస్తూ, అమెరికా మరియు యూరోప్కు చెందిన పౌరులను లక్ష్యంగా చేసుకుని క్రిప్టోకరెన్సీ పెట్టుబడి మోసాలకు పాల్పడుతున్నట్లు అమెరికా అధికారులు వెల్లడించారు. బాధితులను నమ్మించి నకిలీ వర్చువల్ ఆస్తుల వేదికలపై పెట్టుబడులు పెట్టించడం, నిధులను కొల్లగొట్టడం వంటి కార్యకలాపాలలో ఈ కేంద్రాలు పాలుపంచుకుంటున్నాయి. మరోవైపు ఈ సైబర్ మోసాల ద్వారా సమకూరుతున్న నిధులు ప్రాంతీయ సాయుధ బృందాలకు బలం చేకూరుస్తుండటంతో పాటు, మానవ అక్రమ రవాణాకు దారితీస్తున్నాయని నివేదికలు పేర్కొంటున్నాయి.
అమెరికా పౌరుల నుంచి ఆగ్నేయాసియా సైబర్ స్కామ్ కేంద్రాలు గణనీయమైన స్థాయిలో సొమ్మును కొల్లగొట్టాయన్న అంచనాల నేపథ్యంలో, డిపార్ట్మెంట్ ఆఫ్ జస్టిస్, ఎఫ్బీఐ, హోమ్ల్యాండ్ సెక్యూరిటీ విభాగాల సమన్వయంతో ఆర్థిక శాఖ ఈ చర్యలు చేపట్టింది. ఆంక్షల పరిధిలోకి వచ్చిన వ్యక్తులు, సంస్థలకు చెందిన అమెరికాలోని ఆస్తులను స్తంభింపజేయడంతో పాటు, ఆర్థిక లావాదేవీలపై కఠిన నియంత్రణలు అమలు చేయనున్నారు.
సైబర్ నేరాలు, ఆర్థిక మోసాల వెనుక ఉన్న ప్రధాన సూత్రధారులు, వాటికి ఆర్థిక, మౌలిక సహకారం అందిస్తున్న సంస్థలను లక్ష్యంగా చేసుకుని అంతర్జాతీయ స్థాయిలో దర్యాప్తు, నిఘా చర్యలను మరింత ముమ్మరం చేసినట్లు అధికారులు తెలిపారు. ఈ ప్రాంతంలో చట్టబద్ధత, భద్రతను నెలకొల్పేందుకు సంబంధిత ప్రభుత్వాలతో కలిసి పనిచేస్తామని అమెరికా యంత్రాంగం స్పష్టం చేసింది.