భర్త మత్తుమందు ఇచ్చి వేధించిన కేసు..నలుగురు బ్రిటన్ వ్యక్తులకు దోషిగా తీర్పు
సూర్య అంతర్జాతీయ డెస్క్: తన భార్యకు మత్తుమందు ఇచ్చి, ఆన్లైన్ వేదికల ద్వారా అపరిచితులను ఆహ్వానించి లైంగిక వేధింపులకు పాల్పడిన కేసులో బ్రిటన్కు చెందిన నలుగురు వ్యక్తులను వించెస్టర్ క్రౌన్ కోర్టు దోషులుగా తేల్చింది. బాధితురాలు జోవాన్ యంగ్ విషయంలో 2016 నుంచి 2023 మధ్య జరిగిన నేరాలకు సంబంధించి కానర్ సాండర్సన్ డాయిల్, రిచర్డ్ విల్కిన్స్, నార్మన్ మాక్సోని, మహ్మద్ హసన్లపై అభియోగాలు రుజువయ్యాయి. బాధితురాలి అంగీకారం ఉందని, ఆమె భర్తతో కలిసి చేసుకున్న ఊహగా తాము భావించామని నిందితులు వాదించినప్పటికీ, కోర్టు ఆ వాదనలను తిరస్కరించింది.
ఈ కేసులో ప్రధాన నిందితుడైన జోవాన్ మాజీ భర్త ఫిలిప్ యంగ్, 50 ఏళ్ల మాజీ స్థానిక కౌన్సిలర్, తన భార్యపై లైంగిక దాడులు, మత్తుమందు ఇవ్వడం, చిత్రీకరణ, ఆన్లైన్లో పోస్ట్ చేయడం వంటి యాభైకి పైగా నేరాలను ఈ ఏడాది ప్రారంభంలోనే అంగీకరించాడు. సుమారు పదేళ్లకు పైగా ఈ దారుణాలకు పాల్పడినట్లు విచారణలో వెల్లడైంది. మరో నిందితుడు డీన్ హామిల్టన్ కూడా తనపై ఉన్న లైంగిక నేరాల అభియోగాలను ముందే అంగీకరించగా, వీరందరికీ వచ్చే నెలలో శిక్ష ఖరారు చేయనున్నట్లు న్యాయమూర్తి తెలిపారు.
ఫ్రాన్స్లో తన భర్త మత్తుమందు ఇచ్చి డజన్ల కొద్దీ వ్యక్తులతో అత్యాచారం చేయించిన కేసులో పోరాడిన గిసెల్ పెలికాట్ తరహాలోనే, జోవాన్ యంగ్ కూడా తన గుర్తింపును దాచకుండా బహిరంగంగా ముందుకు వచ్చారు. పెలికాట్ కేసు ప్రపంచవ్యాప్తంగా లైంగిక హింస, సమ్మతి అంశాలపై తీవ్ర చర్చకు దారితీయడంతో పాటు ఫ్రాన్స్ చట్టాలలో మార్పులకు కారణమైంది. అలాగే మత్తుమందు ఉపయోగించి జరిపే లైంగిక దాడుల అంతర్జాతీయ నెట్వర్క్లపై బ్రిటన్ నేషనల్ క్రైమ్ ఏజెన్సీతో పాటు పలు దేశాల దర్యాప్తు సంస్థలు సంయుక్తంగా చర్యలు చేపడుతున్నాయి.
బాధితురాలి ధైర్యాన్ని న్యాయమూర్తి ప్రశంసించగా, దోషులకు కఠినమైన జైలు శిక్షలు పడే అవకాశం ఉందని ప్రాసిక్యూషన్ అధికారులు పేర్కొన్నారు. లైంగిక నేరాలలో బాధితుల సమ్మతి, డిజిటల్ వేదికల దుర్వినియోగం వంటి అంశాలపై ఈ తీర్పు అంతర్జాతీయంగా మరోసారి చర్చనీయాంశంగా నిలిచింది.