పార్లమెంటు ఆర్థిక కమిటీ పునర్వ్యవస్థీకరణ: వరుసగా కమిటీ ఛైర్మన్‌గా భర్తృహరి మహతాబ్, సభ్యులుగా చిదంబరం, ప్రఫుల్ పటేల్, గౌరవ్ గొగోయ్
సూర్య జాతీయ డెస్క్: పార్లమెంటు ఆర్థిక కమిటీని 2026-27 సంవత్సరానికి పునర్వ్యవస్థీకరించారు. లోక్‌సభ స్పీకర్ ఓం బిర్లా, రాజ్యసభ ఛైర్మన్ సి.పి. రాధాకృష్ణన్ కలిసి శాఖా సంబంధిత పార్లమెంటరీ స్థాయీ సంఘాలను పునర్వ్యవస్థీకరిస్తూ శనివారం బులెటిన్ విడుదల చేశారు. ఈ మార్పులు సెప్టెంబర్ 26 నుంచి అమల్లోకి వచ్చినట్లు ప్రకటించారు. ఆర్థిక కమిటీ ఛైర్మన్‌గా బీజేపీ ఎంపీ భర్తృహరి మహతాబ్‌ను నియమించారు. అయితే ఆయన ఈ పదవిలో కొత్తగా చేరడం లేదు. ఇప్పటికే ఈ కమిటీకి నాయకత్వం వహిస్తున్న మహతాబ్‌నే మరోసారి కొనసాగించారు.
విడుదలైన జాబితా ప్రకారం, రాజ్యసభ నుంచి పి. చిదంబరం, మిలింద్ మురళీ దేవ్‌రా, ఎం. తంబిదురై, నారాయణ్ దాస్ గుప్తా, అశోక్ కుమార్ మిట్టల్, ప్రఫుల్ పటేల్, యెర్రం వెంకట సుబ్బారెడ్డి, సంజయ్ సేథ్, వినోద్ శ్రీధర్ తావ్డే, ప్రమోద్ తివారీ సభ్యులుగా ఉన్నారు. లోక్‌సభ నుంచి భర్తృహరి మహతాబ్‌తో పాటు పి.పి. చౌదరి, రాజేష్ నారన్‌భాయ్ చూడాసమా, గౌరవ్ గొగోయ్, కె. గోపీనాథ్, సురేశ్ కుమార్ కశ్యప్, డాక్టర్ డి. రవికుమార్, కిషోరీ లాల్, అరుణ్ నెహ్రూ, ఎన్.కె. ప్రేమచంద్రన్ తదితరులకు స్థానం దక్కింది. అధికార, ప్రతిపక్ష పార్టీల నుంచి అనుభవజ్ఞులైన నేతలు ఈ కమిటీలో ఉండటం విశేషం.
ఈ పునర్వ్యవస్థీకరణలో భాగంగా ఇతర కమిటీల నాయకత్వంలోనూ మార్పులు జరిగాయి. హోం వ్యవహారాల కమిటీకి రాధామోహన్ దాస్ అగర్వాల్, రక్షణ కమిటీకి రాధామోహన్ సింగ్ ఛైర్మన్లుగా కొనసాగనున్నారు. విదేశీ వ్యవహారాల కమిటీ అధ్యక్ష బాధ్యతలను కాంగ్రెస్ ఎంపీ శశిథరూర్ నిలబెట్టుకున్నారు. కాగా సిబ్బంది, ప్రజా ఫిర్యాదులు, న్యాయ కమిటీకి బీజేపీకి చెందిన సుజీత్ కుమార్ ఛైర్మన్‌గా నియమితులయ్యారు. ఆయన బ్రిజ్ లాల్ స్థానంలోకి వచ్చారు. ఈ మార్పుల్లో తృణమూల్ కాంగ్రెస్ రెండు కీలక కమిటీల అధ్యక్ష పదవులను కోల్పోయింది.
ఆర్థిక కమిటీ ఆర్థిక శాఖ, కార్పొరేట్ వ్యవహారాలు వంటి విభాగాల విధానాలు, నిర్ణయాలను పార్లమెంటు తరఫున పరిశీలిస్తుంది. స్పీకర్ లేదా ఛైర్మన్ పంపిన బిల్లులను పరిశీలించి నివేదికలను ఉభయ సభలకు సమర్పిస్తుంది. కొత్తగా ఏర్పడిన ఈ కమిటీలు 2026-27 సంవత్సరంలో తమ పరిధిలోని అంశాలను పరిశీలించి నివేదికలు అందిస్తాయి. ఆర్థిక రంగానికి సంబంధించిన ముఖ్యమైన బిల్లులు, బడ్జెట్ ప్రతిపాదనలపై ఈ కమిటీ చేసే సిఫార్సులకు పార్లమెంటు రాజకీయాల్లో ప్రాధాన్యం ఉంటుంది.
