మధ్యప్రదేశ్‌లో తీవ్ర విషాదం:ఒకే కుటుంబానికి చెందిన ఆరుగురు సజీవ దహనం
మధ్యప్రదేశ్‌లో ఘోర అగ్నిప్రమాదం చోటుచేసుకుంది. సివ్నీ జిల్లా ఛపారా ప్రాంతంలో సోమవారం తెల్లవారుజామున సుమారు 3 గంటల సమయంలో ఒక ఇంట్లో ఒక్కసారిగా మంటలు చెలరేగాయి. నిద్రలో ఉన్న సమయంలో ఈ ప్రమాదం జరగడంతో కుటుంబసభ్యులు బయటకు తప్పించుకునే వీలులేక మంటల్లో చిక్కుకుపోయారు. ఈ దుర్ఘటనలో ఒకే కుటుంబానికి చెందిన ఆరుగురు అక్కడికక్కడే సజీవ దహనమయ్యారు.
మృతుల్లో నలుగురు మహిళలు, ఇద్దరు పురుషులు ఉన్నారు. వీరిలో 14 ఏళ్ల బాలిక, ఆరేళ్ల చిన్నారి, రెండు నెలల పసికందు కూడా ఉండటం స్థానికులను తీవ్రంగా కలచివేసింది. ప్రమాద సమాచారం అందుకున్న అగ్నిమాపక సిబ్బంది, పోలీసులు హుటాహుటిన ఘటనా స్థలానికి చేరుకుని మంటలను అదుపులోకి తెచ్చారు. ఇంట్లో విద్యుత్ షార్ట్ సర్క్యూట్ కావడం వల్లే ఈ అగ్నిప్రమాదం జరిగి ఉండవచ్చని పోలీసులు ప్రాథమికంగా అనుమానిస్తున్నారు. ఈ ఘటనపై కేసు నమోదు చేసుకున్న పోలీసులు పూర్తిస్థాయి దర్యాప్తు జరుపుతున్నారు.
