దీపావళి తర్వాత..ప్రపంచంలోనే అత్యంత కాలుష్య నగరంగా నమోదు

న్యూఢిల్లీ :దేశ రాజధాని ఢిల్లీలో వాయుకాలుష్యం ప్రమాదకర స్థాయికి చేరుకుని డేంజర్ బెల్స్ మోగిస్తోంది. దీపావళి పండుగ వేడుకల అనంతరం ఎయిర్ పొల్యూషన్ ఒక్కసారిగా భారీగా పెరిగింది. పండుగ రాత్రి బాణసంచా విచ్చలవిడిగా కాల్చడంతో అర్ధరాత్రి వేళ కొన్ని ప్రాంతాల్లో ఎయిర్ క్వాలిటీ ఇండెక్స్ (AQI) గరిష్టంగా 1760 స్థాయికి చేరిందని, ఇది అత్యంత ప్రమాదకరమని పర్యావరణ నిపుణులు ఆందోళన వ్యక్తం చేశారు. తెల్లవారుజామున 4:30 గంటల సమయానికి కాలుష్య తీవ్రత కొంత తగ్గి 1326కి చేరుకోగా, ప్రస్తుతం ఢిల్లీ సగటు AQI 373గా నమోదైంది.

ప్రాంతాల వారీగా పరిశీలిస్తే సోనియా విహార్‌లో అత్యధికంగా 463 AQI నమోదు కాగా, బురారీ క్రాసింగ్‌లో 452, జహంగీర్‌పురిలో 447గా తీవ్రమైన స్థాయిలో ఉంది. గాలుల వేగం బాగా తగ్గడంతో గాలిలోని విషపూరిత ధూళి కణాలు ఒకే చోట పేరుకుపోతున్నాయని వాతావరణ శాఖ వెల్లడించింది. దీని ప్రభావంతో ప్రస్తుతం ప్రపంచంలోనే అత్యంత కాలుష్య నగరంగా ఢిల్లీ నిలిచింది. కాలుష్యాన్ని అదుపు చేసేందుకు రాజధానిలో 'గ్రాప్-3' (GRAP-3) ఆంక్షలను కఠినంగా అమలు చేస్తున్నారు. ఇందులో భాగంగా నిర్మాణ పనులు, పాత వాహనాల రాకపోకలపై తీవ్ర నిబంధనలు విధించారు.