ఎన్నికల్లో ఓటములకు ఈసీని నిందించడం మాని కాంగ్రెస్ ఆత్మపరిశీలన చేసుకోవాలి: మధ్యప్రదేశ్ సీఎం మోహన్ యాదవ్ హితవు!
సూర్య జాతీయ డెస్క్: ఎన్నికల్లో వరుస పరాజయాలు ఎదురైన ప్రతిసారీ కేంద్ర ఎన్నికల సంఘం (ఈసీఐ)పై, ఈవీఎంలపై నెపం నెట్టడం కాంగ్రెస్ పార్టీకి అలవాటుగా మారిందని మధ్యప్రదేశ్ ముఖ్యమంత్రి డాక్టర్ మోహన్ యాదవ్ తీవ్రస్థాయిలో ధ్వజమెత్తారు. ప్రజలు తిరస్కరించినప్పుడు రాజ్యాంగబద్ధ సంస్థలను నిందించడం మానుకుని, తమ వైఫల్యాలపై కాంగ్రెస్ నాయకత్వం నిజాయితీగా ఆత్మపరిశీలన చేసుకోవాలని ఆయన హితవు పలికారు.
మీడియాతో మాట్లాడిన ముఖ్యమంత్రి మోహన్ యాదవ్.. ఎన్నికల్లో గెలిస్తే ప్రజాస్వామ్యం గెలిచిందని చెప్పుకునే కాంగ్రెస్ పార్టీ, ఓడిపోగానే ఎన్నికల సంఘం పక్షపాత ధోరణితో వ్యవహరించిందంటూ నిరాధార ఆరోపణలు చేయడం హాస్యాస్పదంగా ఉందని మండిపడ్డారు. దేశంలో ఎన్నికల వ్యవస్థ అత్యంత పారదర్శకంగా, స్వతంత్రంగా పనిచేస్తోందని, ప్రజల తీర్పును శిరసావహించలేని వారే ఇలాంటి నెపాలు వెతుక్కుంటారని విమర్శించారు.
ప్రధాని నరేంద్ర మోదీ నేతృత్వంలో కేంద్ర ప్రభుత్వం మరియు బీజేపీ పాలిత రాష్ట్రాల్లో అమలవుతున్న ప్రజా సంక్షేమ పథకాలు, సుపరిపాలన చూసే ప్రజలు భారతీయ జనతా పార్టీకి పట్టం కడుతున్నారని మోహన్ యాదవ్ స్పష్టం చేశారు. ఇప్పటికైనా కాంగ్రెస్ పార్టీ నిరాశ, నిస్పృహలను వీడి, ప్రజల నాడిని గుర్తించి నిర్మాణాత్మక ప్రతిపక్షంగా వ్యవహరించాలని ఆయన సూచించారు.
