కేంద్ర మంత్రి సీఆర్ పాటిల్‌తో భేటీ అనంతరం మంత్రి నిమ్మల రామానాయుడు: పోలవరం పనుల్లో గణనీయమైన పురోగతి!
సూర్య ఢిల్లీ బ్యూరో: కేంద్ర జలశక్తి శాఖ మంత్రి సీఆర్ పాటిల్‌తో గురువారం న్యూఢిల్లీలో ఆంధ్రప్రదేశ్ జలవనరుల శాఖ మంత్రి నిమ్మల రామానాయుడు ఉన్నత స్థాయి సమావేశం నిర్వహించారు. అనంతరం ఏర్పాటు చేసిన మీడియా సమావేశంలో ఆయన భేటీ వివరాలను వెల్లడించారు. కూటమి ప్రభుత్వం అధికారంలోకి వచ్చిన తర్వాత కేంద్ర ప్రభుత్వ సంపూర్ణ సహకారంతో పోలవరం ప్రాజెక్టు నిర్మాణ పనుల్లో గణనీయమైన పురోగతి నమోదవుతోందని మంత్రి స్పష్టం చేశారు.
గత ప్రభుత్వ హయాంలో అనాలోచిత నిర్ణయాలు, బాధ్యతారాహిత్యం వల్ల పోలవరం ప్రాజెక్టు భవిష్యత్తు పూర్తిగా ప్రశ్నార్థకంగా మారిందని మంత్రి తీవ్రస్థాయిలో ధ్వజమెత్తారు. ముఖ్యంగా ప్రాజెక్టుకు గుండెకాయ వంటి డయాఫ్రమ్ వాల్‌ను గత పాలకులు తీవ్రంగా నిర్లక్ష్యం చేశారని, వరదల సమయంలో సరైన రక్షణ చర్యలు చేపట్టకపోవడంతో అది తీవ్రంగా దెబ్బతిన్నదని గుర్తుచేశారు. ఈ చారిత్రక తప్పిదాల వల్ల ప్రాజెక్టు నిర్మాణం ఏళ్ల తరబడి వెనక్కి వెళ్లిందని, ఆర్థికంగానూ తీరని నష్టం వాటిల్లిందని విమర్శించారు.
కూటమి సర్కార్ కొలువుదీరిన వెంటనే ముఖ్యమంత్రి చంద్రబాబు నాయుడు నేతృత్వంలో అంతర్జాతీయ నిపుణులు, కేంద్ర జల సంఘం (CWC) అధికారులతో సమీక్షలు జరిపి డయాఫ్రమ్ వాల్ పునర్నిర్మాణానికి పటిష్ట ప్రణాళిక సిద్ధం చేశామని తెలిపారు. కొత్త డయాఫ్రమ్ వాల్ నిర్మాణంతో పాటు ప్రధాన డ్యామ్ (ఈసీఆర్‌ఎఫ్) పనులను సమాంతరంగా వేగవంతం చేస్తున్నామని పేర్కొన్నారు. నిర్దేశిత గడువైన 2027 నాటికి ప్రాజెక్టును పూర్తి చేసి తీరుతామని, కేంద్రం నుంచి రావాల్సిన నిధులు, అనుమతులను వేగవంతంగా రాబట్టేందుకే ఈ ఢిల్లీ పర్యటన ఉపయోగపడిందని మంత్రి నిమ్మల రామానాయుడు స్పష్టం చేశారు.
